జంధ్యాల రఘుబాబు
9849753598
రోజులాగే అరుణ ఉదయం ఐదున్నరకే లేచింది. అందులోనూ సోమవారం హడావుడి. బ్రష్‌ చేసుకోవటం మొదలు రాత్రి పడుకునే వరకు పరుగే పరుగు. కాలానికి సంకెళ్ళు వేస్తే మన పనులు తీరిగ్గా చేసుకోవచ్చుననుకుంటుంది. ఇలాంటి ఆలోచనలు చేస్తూ కూచుంటే మన మెదడు, శరీరం పనిచేయటం మానేస్తాయి. మనమే బేడీలు వేసుకున్నట్టవుతుంది. అప్పుడు కాలం నవ్వుకుంటూ చూస్తుంది పరుగాపకుండానే.
అసలు ఈ కాలాన్ని ఎవడు కనిపెట్టాడో కదా ఐనా తన చాదస్తం, బానిస భావం కాకుంటే కాలాన్ని ఓ ఆడమనిషి కనిపెట్టి ఉండవచ్చుకదా ఈ పురుషప్రపంచంలో మనిషంటే మగవాడే. వాడికోసమే ఈ వ్యవస్థ మొత్తం పనిచేస్తోంది. ఈ ప్రపంచం వాడికోసమే తయారయింది. వేనోళ్ళ కొలుస్తుంది. అంతెందుకు మామయ్యకు అన్నీ సమకూర్చాకే అత్తయ్య తనగురించి ఆలోచిస్తుంది. తానెందులో తీసుపోయిందామెకి? భర్త శేఖర్కు కూచున్నచోటికే అన్నీ అందించటం లేదా? ఇంకా ఆయనే ఆపని, ఈపని అందుకుంటుంటాడు. ప్రతి దాంట్లోనూ సాయం చేస్తానంటాడు. పిల్లల్ని కూడా అమ్మకు హెల్ప్‌ చెయ్యొచ్చుకదా అంటుంటాడు. అసలు తనకు అందరూ సహాయం చేయడమేంటి. ఈ పనంతా తనదేనా. ఇంటి పని కదా ఇదంతా! ఇంటిపనిలో అమ్మకు సాయపడు అనొచ్చు కదా. ఈ చాకిరీ డిపార్టుమెంట్లన్నిటికి తానే హెడ్డయినట్టు బాధ్యురాలన్నట్టు మాట్లాడతారెందుకు? ఆ కిరీటాన్ని అత్తయ్య తన తలపై పెట్టింది కాని శేఖర్‌ తలపై కాదుకదా. ఆమె కూడా తన అత్తగారినుండి ఆ వారసత్వాన్ని స్వీకరించిందే కదా. ఇవన్నీ ఈ జీవితంలో తేలని ప్రశ్నలు అనుకుని వదిలేసింది అరుణ. లేకపోతే ఇంట్లో పని తెమలక ఆలశ్యమైపోయి స్కూలుకు లేటుగా పోతే అక్కడ హెచ్చెమ్‌తో మాటలు పడాలి. ఇవన్నీ తనకిష్టముండవు.
కాఫీ రెండు గ్లాసుల్లో పోసి అత్త దగ్గరే కూచుంది. ఆ ఐదునిముషాలు ఆ కాఫీ ప్రపంచంలో మునిగారిద్దరూ. రోజంతటిలో ఇదే కొద్దిగా విశ్రాంతి సమయం. పుట్టింట్లో అమ్మతో కలిసి తాగితే ఇక్కడ అత్తయ్యతో. అంతే తేడా, మిగతావన్ని సేమ్‌ టు సేమ్‌. ఈ కాఫీ విశ్రాంతికి కేరాఫ్‌ అడ్రెస్సేమీ కాదు. అది మన మెదడుని, శరీరాన్ని ఇంకో రోజు పని ఎలా చేయాలని, వీలైతే ముందురోజుకంటే ఇంకా బాగా ఎలా చేయాలన్న ఉత్తేజాన్నిస్తుంది. పరిగెత్తే కాలం ఏర్పాటు చేసిందే ఈ కాఫీ అనుకుంటుంది అరుణ. ఆమాట అత్తయ్యకి చెబితే ఆమె నవ్వి ఊరుకుంది. అది కూడా కొన్ని క్షణాలే ఎందుకంటే నవ్వటానిక్కూడా సమయముండదు కదా. ఇంకో పావుగంటకు మామయ్య వస్తాడు తన షుగర్‌ లెస్‌ కాఫీ కోసం. ఆయన వెనుకే శేఖర్‌ ఓ పావుగంట తేడాతో. మళ్ళీ రెండో విడత కాఫీకోసం తప్ప ఇద్దరూ కనబడరు మధ్యలో.
పిల్లలిద్దరూ తమ క్యారియర్లో కొత్తగా స్నాక్స్‌ ఏమైనా చేస్తుందేమోనని అప్పుడప్పుడూ చూసిపోతుంటారు. అమ్మాయి స్వీటి ఎనిమిదో తరగతి, బాబు ఆర?వ్‌ మూడో తరగతి. వారికి ముందురోజు బేకరీలో శెఖర్‌ తెచ్చినవే పెట్టిస్తుంది. ఎప్పుడైనా తాను సెలవు పెట్టినప్పుడు ఫ్రెష్‌గా ఏమైనా చేసిస్తుంది.
తన రెండో విడత కాఫీకోసమొచ్చాడు శేఖర్‌. చేయి ఖాళీ లేదు, స్టవ్‌ అంతకన్నా లేదు. వచ్చి మవునంగానే ఎదగమనీ అన్నట్టు నిలబడ్డాడు.
ఆట చూస్తున్నారా
కాదు ఆటకావాలా పాటకావాలా చూస్తున్నా
సరే చూడండి
కాఫీ
చూస్తున్నారుగా! ఒకదానిపైన కుక్కరు, ఇంకోదానిపైన ఉప్మా
ఏదో ఒకటి దించొచ్చుగా
అప్పుడు ఉడకని అన్నం, ఉండలు ఉండలుగా ఉప్మా, ముందే బొంబాయి రవ, మీకిష్టమైనది''
వద్దులే మరో మాట లేకుండా వెళ్ళిపోయాడు. అరుణకే పాపమనిపించింది.
ఆరోజు సాయంకాలమే ఫ్లాస్కు తెచ్చాడు శేఖర్‌. దానివల్ల కొద్దిగా మేలే జరిగింది కాని మామయ్యకు షుగర్‌లెస్‌ కాబట్టి ఆయనపోసుకుని తాగాక మరో పదినిముషాలకు గ్లాసులో వేసుకుని, చక్కర కలుపుకుని తాగేటప్పటికి చల్లని కాఫీ రెడీ.
ఇక లాభంలేదు ఏదో ఒకటి చేయాలని నిరయించుకున్నాడు శేఖర్‌. ఆఫీసులో, మిత్రుల దగ్గర ఇదే విషయం మాట్లాడుతున్నాడు. తమ అధికారి సునీతా మేడం ఓ మంచి సలహా ఇచ్చింది. నాలుగు బర్నర్ల గ్యాస్‌ స్టవ్‌ తీసుకొమ్మని. అది తీసుకుంటే ఒంటింట్లో అరుగు కొత్తది కట్టాలని చెప్పింది వీణా మేడం. ఇదంతా ఎందుగ్గాని స్టవ్‌ చూసొచ్చి అరుగు కొలత పెట్టి చూడమన్నాడు రవి. ఈ ఐడియా నచ్చింది అందరికీ. ఆన్‌లైన్‌ లో తెప్పించమని రఘునందన్‌ చెప్పాడు. ఇక ఎవ్వరిమాటలూ వినిపించటంలేదు తనకు.
ఇక ఆ పని మీదే ఉన్నాడు శేఖర్‌. ఎవ్వరికీ అనుమానం రాకుండా అరుగు చుట్టుకొలతలు తీసుకొని పేపర్‌లో రాసుకున్నాడు. నాలుగు రోజులు లైన్లో నిలబడి అతి కష్టం మీద పదివేలు డ్రా చేసుకున్నాడు. రవిని తీసుకొని సీదా ఆంధ్రా కిచన్‌వేర్‌కు పోయాడు. నాలగు బర్నర్ల గ్యాస్‌ స్టవ్‌, తన జీవితాన్ని మార్చబోతున్న గ్యాస్‌ స్టవ్‌ను చూసుకొని మురిసిపోయాడు. దాని కొలత చూశాడు. ఇంకా రెండంగుళాలు మిగులుతుంది తమ అరుగుమీద. జేబులోనుండి ఐదు రెండువేల నోట్లు ఫెళ ఫేలలాడుతున్నవి తీశాడు. రవి దాన్ని పట్టుకొని కూర్చున్నాడు. రేపన్నది మాపన్నది పనికిరాదులే ఓ మారియా అని ఈల వేసుకుంటూ దూరుకుపోతున్నది బండి. జీవితంలో తాను ఒక బహుమతయితే ఈ కొత్త స్టవ్‌ రెండోదని శ్రీమతికి చెప్పాలని ఉర్రూతలూగుతున్నాడు. జీవితాన్ని జీవించాలిగాని ఇలాంటి సంతోషాలు ఎన్నో ఉంటాయని మనసులో అనుకున్నాడు. అసలు పెర్సనాలిటీ డెవెలప్‌మెంటు మీద తానే ఓ పుస్తకం రాస్తే పోలా అని తనను తాను ఓ వీరేంద్రనాథ్‌లాగా పట్టాభిరాంలాగా ఊహించుకున్నాడు.
శ్రీమతి స్కూలునుండి వచ్చేలోగా పాత స్టవ్‌ తీసేసి నాలగు బర్నర్ల కొత్త స్టవ్‌ తగిలించాడు. అప్పుడు అమ్మ చూసిన చూపులో ఎన్నో అర్థాలు కొట్టొచ్చినట్టు కనిపించాయి శేఖర్కు. అలాంటి చూపే తన తండ్రినీ చూసిందామె, మీరూ ఉన్నారు భార్యను సుఖపెట్టే ఇలాంటి పని ఏనాడైనా చేశారా? అన్న అర్థం అందులో గోచరమవుతోంది.
అనుకున్న ప్రకారం ఈ కొత్త గ్యాస్‌ స్టవ్‌ గురించి ఎవ్వరూ అరుణకు చెప్పకూడదు, తనంత తానే చూసి ఆశ్చర్యపోవాలి. అనుకున్నట్టే ఆమె వచ్చింది.
ఏమిటి మీరు ఈసమయానికే ఇల్లు చేరారు శేఖర్‌ వైపు చూస్తూ
ఏమీ లేదు డియర్‌, కొద్దిగా తల నొప్పి ఉంటే ముందుగా వచ్చేశానంతే
ఉండండి కొద్దిగా కాఫీ పెట్టిస్తా అని పది నిముషాల్లో స్నానం ముగించి టీచర్‌ అరుణను మామూలు అరుణగా మార్చేసింది. వచ్చి లైటరుకోసం వెదకసాగింది. అరుగువైపు కన్నెత్తి కూడా చూడలేదు.
లైటరెవరైనా చూశారా?
లేదు దాన్ని తీసిపెట్టిన శేఖర్‌
సరే అగ్గిపెట్టే శరణ్యం'' అనుకొని అరుగువంక తిరిగింది. ఆశ్చర్యం, కొత్త గ్యాస్‌ స్టవ్‌! అదీ నాలగు బర్నర్లది
అరుణ మొహం ఒక్కసారి విప్పారింది. శేఖర్‌ దొంగ తలనొప్పి తెలిసిపోయింది. కిచన్‌లోకొచ్చాడు.
ఇక మా అరుణకు లైటరుతో అవసరం లేదు. నాబ్‌ తిప్పగానే బర్నరు వెలుగుతుంది అని స్టవ్‌ గురించి డెమో ఇచ్చిన అబ్బాయి మాటలే కాస్త మార్చి చెప్పాడు.
''అబ్బ థ్యాంక్సండి. ప్రాణం లేచొచ్చినట్టుగా ఉంది
థ్యాంక్స్‌ చెప్పాల్సింది ఇప్పుడుకాదు. ఉదయం పనులన్నీ చక చకా అయిపోయినప్పుడు చెప్పాలి
ఓ వారం ఇంట్లో, వంటింట్లో ఉదయం శాంతి పావురం తన ఇష్టమొచ్చినట్టు తిరిగింది, అదీ నోట రెండు లేత ఆకులుపట్టుకుని మరీ తిరిగసాగింది. అత్తయ్యతో అరుణ గడిపే సమయం అదీ పొద్దుటిపూట ఓ పదినిముషాలు పెరిగింది. వాట్స్‌యాప్‌ లో వచ్చే మెసేజెస్‌ ఉదయం కూడా చూస్తోంది అరుణ.
నాలగు బర్నర్లతో కుస్తీ పడుతున్న అరుణకు లోపలినుండి మామగారు చక్కెరలేని కాఫీ, అదీ రెండవసారి ఇవ్వమని తియ్యగా అడిగారు.
ఇస్తున్నాను మామగారు అని ''స్వీటీ ఈ కాఫీ తాతయ్యకివ్వమ్మా అరిచింది అరుణ.
''స్పెషల్‌ టీ ఔర్‌ ఏక్‌ కప్‌ పేపర్లోంచే అరిచాడు శేఖర్‌ హోటల్‌ బాయ్‌ ని అనుకరిస్తూ
అదీ రెడీ తీసుకుపోవచ్చు అరుణ
ఇంతలో ఆర?వ్‌ వచ్చాడు అమ్మా నాకీరోజు గ్రీన్‌ పీస్‌ ఫ్రై అని తన స్నాక్స్‌ మెనూ చెప్పిపోయాడు
తాతయ్యకు కాఫీ ఇచ్చి స్వీటీ కూడా వచ్చింది నాకు స్వీట్‌ కార్న్‌
ఇంకో వారానికి ఇలాంటి డైలాగులతోనే ఒక్కొక్కరూ తమకు కావలసిన వాటిని చెప్పిపోతుంటే అరుణ మనసులో ఏదో తట్టింది
శేఖర్‌ అని గట్టిగా అరిచింది
చెప్పు డియర్‌ అని టీగానీ మూడోసారి ఇన్స్తున్నావా అని తీయగా అడిగాడు
ఈ కొత్త స్టవ్‌ ఎవరికోసం తెచ్చావ్‌?
అదేం మాట డియర్‌? మా ఇంటిదేవత
మధ్యలోనే కట్‌ చేసి
నిజం అరుణా నీకోసమే
నాకోసమే అంటే నా పనులకోసమేగా?
అంతే కదా
అంటే నా పనులన్నీ మీ సుఖాలకోసమేగా
''చెప్పు నాకు సమాధానం కావాలి''
అంటే అంటే
కంప్యూటర్లు వచ్చాక పనెక్కువయిందని మా ఫ్రెండ్‌ కాంతి చెబుతుంటే నాకు తమాషాగా అనిపించేది. కానీ ఇప్పుడు తెలిసొచ్చింది ఆ విషయం. మాడ్రన్‌ టైమ్స్‌ లో చార్లీ చాప్లిన్‌లా తయారయింది నా పరిస్థితి. కారు విడిభాగం ఒక్కో నట్టూ తిప్పుతున్న చాప్లిన్‌ గుర్తొస్తున్నాడు. కన్వేయర్‌ బెల్టు కొద్దిగా స్పీడు తిప్పితే ఆయన ఎక్కువ నట్లు తిప్పాలి, అది చూసి నవ్వుకున్నానే గాని దాని వెనుక యజమాని చేస్తున్న శ్రమ దోపిడి ఎలాగుందో నాకర్థమయిందండీ
అందరూ వింటున్నారు మవునంగా
ఈ కొత్త స్టవ్‌ వచ్చినప్పటినుండీ చూస్తున్నాను. దాన్ని చూపి నాతో ఎక్కువ పని చేయిస్తున్నారందరూ. నిజమే అది నా సుఖం కోసమే. కానీ దాని ముసుగులో మీ సుఖాలు దాగి ఉన్నాయండీ. చెప్పండి అవునో కాదనో ఏదో ఒక మాట చెప్పండి గట్టిగా అరవలేదుగాని అరుణ వేసిన ప్రశ్న భావగఠితేంగా ఉంది
ఎవ్వరిదగ్గరా అరుణ ప్రశ్నకి సమాధానం లేదు
ఇదంతా చూస్తున్న శాంతి పావురం కళ్ళు చెమ్మగిల్లాయి. ఒకింత ప్రశంసా పూర్వకంగా చూసిందది అరుణ వైపు