మరికొన్ని కవితలు

నాన్న - కొత్తపల్లి మణీత్రినాథరాజు

దిగులు మబ్బు - తిరునగరి శరత్‌ చంద్ర

జ్ఞాపకాల సంతకం - సాంబమూర్తి లండ

మేం నిద్రపోతున్నాం -  హిందీ మూలం: మంగలేశ్‌ డబరాల్‌

                                    తెలుగు: పాయల మురళీకృష్ణ

పురిటి మట్టి - శ్రీనివాస్‌ అంకే 

జ్ఞాపకాల నిశీధి - సునీత గంగవరపు

జ్ఞాపకాల సంతకం - సాంబమూర్తి లండ - 9642732008

గడిచిన జీవితమంతా
కాలం పుటల మీద
జ్ఞాపకాల చెరగని సంతకం!
వర్తమానం -
రేపటి జ్ఞాపకాల పూలకొమ్మలకు
నీళ్ళు అందించే చెట్టు వేరు
వేలమైళ్ళ జీవనయాత్రలో
బాల్యం జ్ఞాపకాల తొలి అడుగు
యవ్వనం -
వసంత కోయిల పాడే పచ్చని స్మతిగీతం
రేణువులు రేణువులుగా జారే
జ్ఞాపకాల పుప్పొడి వద్ధాప్యం!
రాత్రికి రాత్రే వికసించిన పువ్వులా
కాలం ఒక్కోసారి
అందమైన జ్ఞాపకమై విరబూస్తుంది!
కానీ జ్ఞాపకాలన్నీ
హొయలొలికే సీతాకోకచిలుకలైతే కావు
కొన్ని జ్ఞాపకాలు
తడుముకున్న ప్రతిసారీ
గుండెల్లో గుచ్చుకునే ముళ్ళకంపలు!
తీపివో చేదువో
కాలాన్ని జ్ఞాపకాలుగా పోగేసుకుంటూ
సాగించే అద్భుత ప్రయాణమేనేమో జీవితమంటే!
జీవితాన్ని జ్ఞాపకాలుగా ముద్రించే
అనివార్య పరిణామమేనేమో మరణమంటే!

 

నాన్న - కొత్తపల్లి మణీత్రినాథరాజు - 9949389296

నాన్న కన్నెర్ర చేస్తే
భయమే కాదు
బాధ్యతని చెప్పింది
బ్రతుకు పయనం నేర్పింది.
చేయందిస్తే
పడినప్పుడు లేవడం నేర్పింది
పడిలేచి నడవడంలో
నేర్పు చెప్పింది.
చేయి లేపినప్పుడు
తప్పును గుర్తించమంది
తప్పు చేయకుండా
ఒప్పై నిలబెట్టింది.
కసురుకున్నప్పుడు
ఊపిరి బిగబెట్టించి
నిట్టూర్పులను
జయించడం చేతనైంది.
మట్టికాళ్ళతో నడుస్తుంటే
మట్టి విలువ కనిపించేది
మట్టిలో మొలకెత్తే
రైతు తనాన్ని నేర్పింది.
మాట్లాడుతుంటే
మనసు బయటపడేది
మనిషికీ మనసుకీ
వారధై వెలుగు చూపింది

పంటచేను కోస్తుంటే
దేశానికి వెన్నెముక
విలువైన పాటను పుట్టించి
రేపటి రైతై సాగమంది.
పంటని అమ్ముతున్నప్పుడు
కాటాకాడ దళారితనంపై
నిఘాని చెప్పి
దోపిడీని ఆపే మాట చెప్పేది

జీవన సారం చెబుతుంటే
మట్టికీ మనిషికీ మధ్య
బంధాలకు ఊపిరోసీ
ఊరంటా పంచడం నేర్పింది.
కన్నీళ్శు మింగటం
రేపటి పంట యుధ్ధానికి
ధైర్యమౌతూ
కొత్త శక్తికి వీలు వ్రాసేది
అందుకే నాన్న నాన్నే
దేశంకోసం వెన్నలా కరుగుతూ
కుటుంబ మెతుకు ముద్దలో
నెయ్యిలా కలిసి పోతున్నాడు.

నాన్న
ఆశించేది అదే
శ్వాసించేదీ అదే
ప్రేమించేదీ అదే
ప్రేమయ్యేదీ అదే!

నాన్న
గుప్పెడంత గుండె నాలుగు గదుల్లో
దేశం, కుటుంబం
విలువలూ, విచారణలూ
ప్రసరిస్తుండటం నాన్న చిరునామా
విశ్వ వేదికపై
సూర్య చంద్రులతో
తిరుగుతూనే ఉంటుంది.

 

దిగులు మబ్బు - తిరునగరి శరత్‌ చంద్ర - 6309873682


దిగులు మబ్బొకటి
బతుకు ఆకాశంలో పరుచుకుంది
చీకటి తన జుట్టును విరబోసి
నల్లదనాన్ని అంతటా అద్దుతోంది
నా స్వేచ్ఛను ఆవిరి చేసి
గుబులుపక్షి నా ఒంట్లో స్వేచ్ఛగా విహరిస్తోంది
ఇంట్లో కాదు కాని
నా ఒంట్లో
ఆకలి పొయ్యిలా మండుతోంది
చిటపట అంటూ కడుపులో కాలుతోంది
కాలం
నాపై కన్నెర్ర జేసి
తాను మాత్రం
కంటిరెప్పలు మూసి నిద్రలోకి జారుకుంది.
ఇప్పుడు లోకమంతా చీకటే
తెల్లారితే లోకానికి వెలుగొస్తుంది
నా బతుకు మాత్రం చీకట్లోనే తెల్లారిపోయేట్టుంది.
నాకైతే కంటికి కునుకు లేదు
ఒంటికి ఓపిక లేదు
కష్టాల కౌగిలింతలు తప్ప
ఆనందపు ఆనవాళ్ళు ఆవగింజంతైనా లేవు.
కులాసా కాసింత కాలక్షేపం
చేద్దామని
నన్నిడిచిపెట్టి వెళ్ళి ఎన్నేళ్ళయిందో?
నా గుండెను చిరునామాగా చేసుకుని
ఈ గుబులు గులాంగిరీ చేస్తుంది.
కష్టాలు, కన్నీళ్ళు, చీకట్లు, ఆకళ్ళు
సైన్యంగా మారి
పగటిపూట ఎండలాగా నాపై పగబట్టాయి.
నేను మాత్రం నిశ్శబ్దంగా ప్రవహిస్తూనే ఉన్నాను..
మరి -
ఈ దిగులుమబ్బు ఎప్పుడు దిగిపోతుందో?
గుబులుపక్షి రెక్క ఎప్పుడు తెగిపోతుందో?
స్వేచ్ఛాసంతోషం నా ఇంటిలో
ఎప్పుడు వెలుగుతుందో?

 

మేం నిద్రపోతున్నాంహిందీ మూలం: మంగలేశ్‌ డబరాల్‌
తెలుగు: పాయల మురళీకృష్ణ - 
6300396530


నది మీద
అరణ్యం నీడ కురుస్తోంది
మేం నిద్రపోతున్నాం

ఒడ్డు మీద
బోడిరాయి మెరుస్తోంది
మేం నిద్రపోతున్నాం

చీకటి రాత్రి
తెల్లగా పుష్పిస్తోంది
మేం నిద్రపోతున్నాం

మా పంటపొలాల్ని
వరద ముంచెత్తింది
మేం నిద్రపోతున్నాం

మా పిల్లలు వాళ్ళ కాపీ పుస్తకాల్లో
చనిపోయిన వారి ముఖాలు చిత్రిస్తున్నారు
మేం నిద్రపోతున్నాం


పురిటి మట్టి - శ్రీనివాస్‌ అంకే 9652471652


మట్టి విత్తనమవుతుంది
చెట్టై ఆకాశాన్నందుకుంటుంది
తిరిగి విత్తనమై మట్టిలో కలిసిపోతుంది!
మట్టిలో విత్తనం కలిసిందా ?
విత్తనంలో మట్టి కలిసిందా ?
మట్టి గుడ్డవుతుంది
పక్షై పైకెగురుతుంది
దిగంతాల దాకా ఎగిరి
సోలి రాలి మట్టిపాలవుతుంది!
గుడ్డు మట్టి పాలయిందా ?
మట్టి గుడ్డు పాలయ్యిందా ?
మట్టికి పుడతాడు
ఎవర్నో ప్రేమిస్తాడు
ఎవర్నో ద్వేషిస్తాడు
మట్టిని తింటూ పెరుగుతాడు
అంతరిక్షంలో అడుగులు వేస్తాడు.
చివరికి మట్టిలో లయమైపోతాడు.
మట్టిలో మనిషి లయమయ్యడా ?
మనిషిలో మట్టి లయమయ్యిందా ?
నీళ్ళంతా మట్టితో
ఈ గోళం ఎక్కడెక్కడో తిరుగుతుంది.
మూడు భాగాలు నీళ్లు
ఒక భాగమే నేల !
నీళ్లనాశ్రయించుకొని మట్టి వుందా ?
మట్టినంటుకొని నీళ్లున్నాయా ?
్జ
బొగ్గులా నల్లగా,
బంగారంలా పచ్చగా,
ముత్యంలా తెల్లగా,
ఒక్క మట్టిమాత్రమే నవ్వగలదు.
భిన్నరూపాలుగా
తనను తాను పునః సష్టించుకొనే
ఒకే ఒక ప్రాణి మట్టి !

రెండు హైడ్రోజన్‌ పరమాణువులు
ఒక ఆక్సిజన్‌ పరమాణువూ
కలిస్తే నీళ్ళని చెప్పినవాడు,
ఎన్ని మూలకాలు కలిస్తే
ఈ నేల ఏర్పడిందని
ఎందుకు చెప్పలేడు !

మనిషంతా ఎంత !
పిడికెడు మట్టి ...

 

జ్ఞాపకాల నిశీధి - సునీత గంగవరపు


రాత్రి నన్ను సమీపిస్తుంటే
మెత్తటి గాయాలేవో పచ్చిగా విచ్చుకున్నట్లుంటుంది
గత స్మతుల లేత గుబుర్లను
పరవశంతో హత్తుకున్నట్లుంటుంది

చీకటి చూరు కింద కలల దీపాలు వెలిగించుకొని..
కఠిన పాఠాలెన్నో నేర్చుకున్నాను
ఆకాశ వనంలో వేలాడే తారల్ని లెక్కిస్తూ..గెలుస్తూ ఓడిపోయాను
ఓడిపోతూ..గెలిచాను

గుండె చెమరింతకు
రాలిపోయిన ఆకుల్నీ..
వాడిపోయిన ఆశల్నీ రాశి పోసి
మోకరిల్లిన చూపులతో అలసిపోతుంటాను
చందమామ నవ్వుల్నీ
చైత్రమాసపు పువ్వులనీ ఏరుకుంటూ..
నన్ను నేను మరచిపోతుంటాను
చీకటిలో..నాకు నేను కనిపిస్తాను
వేనవేల ప్రతిబింబాలుగా
విస్తరిస్తాను

ఈ నిశీధి నాకు ఎన్నో విషయాలు చెప్తుంది
విషాదాలు పరిచయం చేస్తుంది
నాకు రాత్రి పూట
అమ్మ పాడే జోలపాట వినిపిస్తుంది
రాత్రిలో కరుగుతుంటే
ప్రతి క్షణం కొత్తగా బతుకుతున్నట్లుంటుంది

బహుశా.. అందుకేనేమో
నేను రాత్రి కోసం కలలు కంటాను
జ్ఞాపకాలను ఒలుచుకుంటూ
చీకటి సంద్రంలో
మళ్లీ మళ్లీ మునుగుతుంటాను