వ్యక్తి స్వేచ్ఛకు విఘాతం

సంపాదకీయం

    దేశంలో ప్రతి కంప్యూటర్‌పైనా నిఘాపెట్టేందుకు పది సంస్థలకు అనుమతినిచ్చిన కేంద్ర ప్రభుత్వచర్య అప్రజాస్వామికమైంది. నిఘా నీడలో పౌరులు బతకాల్సిరావడం ప్రజాస్వామ్య సూత్రాలకే విరుద్ధం.  ఇంటలిజెన్స్‌ బ్యూరో, సిబిఐ, రెవెన్యూ ఇంటలిజెన్స్‌, ఎన్‌ఐఎ, సెంట్రల్‌బోర్డ్‌ ఆఫ్‌ డైరెక్ట్‌ టాక్సెస్‌, ఎన్‌ఫోర్స్‌మెంట్‌ డైరెక్టరేట్‌ తదితర పదిసంస్థలు ఎవరి కంప్యూటర్‌లోకైనా అధికారికంగా జొరబడటం, గోప్యతను, స్వేచ్ఛను గంగలో కలిపే చర్య. గత ఎన్నికల్లో ప్రధాని మోడీ విజయానికి ప్రధానంగా దోహదం చేసిన సోషల్‌మీడియానే ఇప్పుడు ప్రభుత్వానికి అతి పెద్ద సవాలుగా కనిపిస్తుంది. బడా మీడియాను దాని అధిపతుల సాయంతో ఆడించవచ్చును గాని కోటానుకోట్ల మంది చేతుల్లో నడిచే సోషల్‌ మీడియాను నియంత్రిత మార్గంలో నడిపించడం అసంభవం. అందుకే దాని పీక నులమాలంటే ముందు సంకెళ్లు వేయాలి. ఎవరు ఏం రాస్తున్నారో వారి నేపథ్యమేమిటో నిఘా వేయాలి. ఆరెస్సెస్‌, బిజెపిల మతతత్వ రాజకీయాలను ఏకపక్ష పోడకలను విమర్శించే వారందరిని వెంటాడాలి. అసలు ముందే ఒక అభద్రతా వాతావరణం సృష్టించి హడలగొడితే ఎవరూ విమర్శకు, ప్రశ్నించడానికి సాహసించరు. ఇది ఏలిన వారి సంకల్పం. గతంలో గోవింద పన్సారే, కల్బుర్గి, గౌరీ లంకేశ్‌ వంటి వారి ప్రాణాలు తీయడంపై తీవ్ర నిరసనవ్యక్తమైంది. జెఎన్‌యు, హెచ్‌సియు వంటి చోట్ల  ప్రజాస్వామిక సంస్థలపై, మేధావులపై దాడులు ఖండనకు గురైనాయి. అందుకే ఇప్పుడు దేశభద్రత ముసుగులో స్వంత పౌరులపైనే నిరంతర విశృంఖల నిఘా వేసి వేధించేందుకు సర్కారు సన్నద్ధమైంది. ఈ కొత్త ఉత్తర్వుల ప్రకారం ఎవరి కంప్యూటర్‌లో నిక్షిప్తమైన సమాచారమైనా నిఘా సంస్తలు హస్తగతం చేసుకోవచ్చు. దాని ఆధారంగా వారిని ముప్పు తిప్పలు పెట్టొచ్చు. విడ్డూరమైన విషయమేమంటే మన పోస్టును ఎవరైనా అవాంఛనీయ వ్యక్తి వీక్షించినా మూల రచయితపై ఆంక్షలు అదుపులు వచ్చేస్తాయి. ఇన్ఫర్మేషన్‌ చట్టం 2000 సెక్షన్‌69(1) కింద ఈ నియంత్రణను నిఘాను అనుమతిస్తున్నట్టు కేంద్రం చేసిన ప్రకటనను ప్రతిపక్షాల మీడియా సంస్థలు ప్రజాస్వామిక ఉద్యమ కారులూ తీవ్రంగా నిరసిస్తున్నారు. సర్వీసు ప్రొవైడర్‌తో సహా అందరూ శిక్షను అనుభవించాల్సి వస్తుంది. పైగా ఏది నేరం ఏది కాదు అని నిర్ధారించే అధికారం కూడా వారిదే గనక దేన్నయినా నేరంగా చూపించవచ్చు. ప్రభుత్వానికి నిఘా సంస్థలకూ హద్దూ ఆపులేని అధికారాలు కట్టబెడుతున్న ఈ చట్టం చాల ప్రమాదకరమైంది. రాజ్యాంగం ప్రసాదించిన ప్రాథమిక హక్కులకు కూడా భంగకరమైంది. వెంటనే ప్రభుత్వం ఈ  ఉత్తర్వులు వెనక్కు తీసుకోవాలి. అప్పటివరకూ అందరూ పోరాడాలి. లేకుంటే ఈ దాడి ఇంతటితో ఆగదు. ఇదంతా సుప్రీంకోర్టు తీర్పు ఆదేశాల ప్రకారం చేస్తున్నట్టు సమర్ధించుకుంటున్నా అది సాకు మాత్రమే.

  •  

పాఠకులకు, రచయితలకు, శ్రేయోభిలాషులకు నూతన సంవత్సర శుభాకాంక్షలు.