ఆందోళనకరం.. అనుచితం

ప్రధాని నరేంద్ర మోడీ హత్యకు కుట్ర చేశారనే ఆరోపణతో దేశంలోని వివిధ ప్రాంతాలకు చెందిన సుధాభరద్వాజ్‌, గౌతమ్‌ నవలఖ్‌, వరవరరావు, వెర్నన్‌ గోంజాల్వెజ్‌, అరుణ్‌ ఫెరీరాలను అరెస్టు చేసిన తీరును అత్యున్నత న్యాయస్థానం తప్పు పట్టింది. ప్రభుత్వ విధానాలపై విమర్శ, అసమ్మతి ప్రజాస్వామిక హక్కులనీ వాటిని తొక్కిపట్టడం వల్ల దేశానికి ముప్పు అని హెచ్చరించింది. సుప్రీం కోర్టే ఇంత తీవ్ర వ్యాఖ్యలు చేసినప్పుడు ఇక మిగిలిన వాళ్లం పెద్దగా చెప్పాల్సిందేముంటుంది? 2018 జనవరి 1న మహారాష్ట్రలోని భీమ్‌ కోరెగావ్‌లో ఒక చారిత్రిక సందర్భంలో దళిత సంఘాలు ఈల్గార్‌ పరిషత్‌ గా ఏర్పడి విజయోత్సవం తలపెట్టాయి. దాన్ని విఫలం చేయాలని కొన్ని హిందూ చాందస సంస్థలు కూటమిగా ఏర్పడి అడ్డుకున్నాయి. దళిత నాయకులను అరెస్టు చేసి దేశద్రోహం వంటి ఆరోపణలు ముందుకు తెచ్చారు. దీనిపై అంబేద్కర్‌ మనవడు ప్రకాశ్‌ అంబేద్కర్‌తో సహా   నిరసనోద్యమం నడిపారు.  దాంతో పాలకులు ఈ ఘటనలను మరో మలుపు తిప్పి ఈ హింసాకాండ వెనక మావోయిస్టు హస్తమున్నదునే దుమారం లేవదీశారు. అలాటి వారిని  జులైలో అరెస్టు చేసినప్పుడు దొరికిన లేఖల్లో  ప్రస్తుత ప్రధానిని గతంలో రాజీవ్‌ గాంధీని హత్య చేసినట్టే అంతమొందించాలని సూచించినట్టు కథనాలు విడుదల చేశారు. ఆ సందర్భంగానే వివి అంటూ వరవరరావు పేరు ప్రస్తావనకు వచ్చిందంటారు. ఇవన్నీ కల్పిత సాక్ష్యాలనీ కట్టుకథలనీ భావించడానికి చాలా కారణాలున్నాయి. ఎందుకంటే వాస్తవంగా రెచ్చగొట్టిన మతతత్వవాదులపై ఎలాటి చర్యలూ తీసుకున్నది లేదు. అంతకు ముందు మహారాష్ట్రలోనే నరేంద్ర దబోల్కర్‌, గోవింద పన్సారే వంటివారి హత్యలు జరిగాయి. కర్ణాటకలో కల్బుర్గి, గౌరీ లంకేశ్‌ హత్యచేయబడ్డారు. ఈ సంస్థలు వాటిపై ఎలాటి దర్యాప్తు జరిపింది లేదు. ఇంత బలమైన ప్రభుత్వం ఏదో లేఖలో పేర్కొన్న దానికి  కంగారు పడాల్సిన అవసరమే కనిపించదు. అదొక సాకు మాత్రమే. మావోయిస్టుల భావాలతో చర్యలతో ఎవరికైనా అనంగీకారం వుండొచ్చు గాని ఆ పేరిట రచయితలు, మేధావులపై దేశద్రోహం, హత్యాకుట్ర వంటివి మోపి ఇళ్లపై దాడి చేయడం అప్రజాస్వామికం. రొమిల్లా థాపర్‌, ప్రభాత్‌ పట్నాయక్‌, దేవకి జైన్‌, సతీష్‌ దేశ్‌పాండే, మజా ధరువాలా వంటి మేధావులు అక్రమ అరెస్టులపై అదేరోజు పిటిషన్‌ వేయడంతో సుప్రీం కోర్టు జోక్యం చేసుకుని వారిని గృహ నిర్బంధానికి పరిమితం చేసింది. అంటే ఇప్పటికీ అరెస్టులోనే వున్నారు. ఇంత తీవ్ర ఆరోపణలు చేసిన పూనే పోలీసులు అభియోగపత్రం దాఖలు చేయడానికి మాత్రం మూడు నెలల కాలవ్యవధి అడగటం ఆశ్చర్యకరం. దాన్నిబట్టే డొల్లతనం తెలిసిపోతుంది. ప్రజా ఉద్యమాలపై దాడికి దళితులలో వస్తున్న నూతన  చైతన్యానికి  మావోయిస్టు ముద్ర వేసి వేటాడటం దారుణం. గతంలో జెఎన్‌యు, హెచ్‌సియులలో జరిగిన దాని కొనసాగింపే ఇది. అందుకే ఈ నిర్బంధాన్ని   అరెస్టులనూ వేధింపులను ప్రతివారూ ఖండించాలి. రచయితల, మేధావుల, సామాజిక కార్యకర్తల భావస్వేచ్చను కాపాడుకోవాలి. మోడీ పాలనలోనూ ఇక్కడ తెలుగు రాష్ట్రాలలోనూ ఇదే తరహాలో ఉద్యమాలపైన మీడియాపైన  దాడులు ఆంక్షలు పెరుగుతున్నాయి. మరోవైపున కులమత శక్తుల అసహనం పరాకాష్టకు చేరుతున్నది. ఈ నిర్బంధకాండనూ విద్వేష ప్రచారాలను అడ్డుకోవడం ద్వారానే ప్రజాస్వామ్యాన్ని కాపాడుకోగలం.