కరోనా కవితలు

అమ్మా! నీకు వందనం! - మందరపు హైమవతి  

కాలరెగరేసిన చెట్టు - నవీన్‌  

పట్టాల కింద దేశం - శిఖా-ఆకాష్‌  

కరోనాను బొందవెడ్దాం - పున్నమి వెంకటయ్య  

ఔను.... వారు కరోనాను జయించారు! - సరికొండ నరసింహారాజు  

లాక్డౌన్‌ కాలం - ఆవుల చక్రపాణి యాదవ్‌  

ఎర్రని పాద ముద్రలు - ఎస్‌. ఏం. సుభాని 

కన్నీటిని తుడిచే చేయి - శ్రీలక్ష్మి చివుకుల

దూరాంతరం - గరికపాటి మణీందర్‌ 

కాళ్ళు పాఠాలు చెబుతాయి - పొత్తూరి సుబ్బారావు  

ఇక్కడ ప్రవేశం లేదు! - పుట్టపర్తి మల్లికార్జున  

ఎవరిదీ చూపు - విజరు కోగంటి  

ఎంతెంత దూరం? - యు. సోమకుమారి  

తల్లివేరు తలపులో - దామరకుంట శంకరయ్య  

కొత్తపాఠం - ఈతకోట సుబ్బారావు  

ఆలో లక్షణా అన్న శోకాలు ... - సి.హెచ్‌.వి. లక్ష్మి  

 అమ్మా! నీకు వందనం!  - మందరపు హైమవతి - 9441062732

ఆకాశమింకా సూర్యుణ్ణి తిలకంగా దిద్దుకోకముందే
వీధిమొగలో ఉదయిస్తుంది ఆమె
ప్రాణవాయువే మృత్యుపరిమళమై
తోటి మనిషే వైరస్‌ వాహకుడనే సందేహం పురుగు
తలను తొలిచి వేస్తుంటే
దూరాన్ని పాటిస్తూ తలుపులు మూసి
భద్రతా ప్రాకారాల మధ్య బంధితులమై
అరచేతుల విరులను అనుక్షణం జలాభిషేకం చేస్తూ
నాలుగ్గోడల పంజరంలో జాగ్రత్తల ఊచల మధ్య
కులాసా రాగాలు పాడుకుంటూ కాలుమీద కాలు వేసుకొని
కాలం గడపడమే సమస్యగా తిట్టుకొంటున్న వేళ
చీపురు ఆయుధంతో
చెత్తపై యుద్ధం ప్రకటించే యోధురాలు ఆమె
చెత్తకుండీ ఉమ్మితొట్టి వీధికి పర్యాయపదాలుగా మార్చి
విసిరేసిన ఎంగిలాకులు తిని పారేసిన అరటి తొక్కలు
రక్తపు రంగు కిళ్ళీ మరకలు గుట్కా ఉమ్ములతో
అత్యంత జుగుప్సాకర వీధిని
ముఖంపై చెరగని చిరునవ్వుతో ఏ జాగ్రత్తలు లేకుండానే
బ్లీచింగ్‌ పౌడరు చల్లి చల్లి పుళ్ళు పడిన చేతులతోనే
స్వధర్మమే మహాధర్మమని విధి నిర్వహణే విద్యుక్త ధర్మమని
సమస్తాన్ని సమదృష్టితో చూసే యోగినిలా
కొంచెంకొంచెంగా చిమ్మడం మొదలుపెడుతుంది
మునివేళ్ళ గోళ్ళతో తాకడానికి కంటిచూపుల చివర్లతో తడమడానికి
అసహ్యించుకొనే చీకటిలాటి మురికిని తొలగిస్తూ
ఆరోగ్యం ఊయలలో అందరినీ ఊపే అమ్మా!
నీకు వందనం!
జన్మనిచ్చిన తల్లిదండ్రులు
జ్ఞానపాఠాలు నేర్పిన గురువుల
రుణం తీర్చుకోలేము
కుడి ఎడమ తేడా లేక
అపరిశుభ్ర వీధులను శుభ్రనదులుగా మారుస్తూ
అలికి ముగ్గుపెట్టిన ముంగిలిలా
వెలుతురు కిరణాలు ప్రసరించిన ఆకాశంలా
మిలమిలా మెరిసిపోయేలా తీర్చిదిద్దుతున్న ఆమెకు
ఏమిచ్చినా రుణం తీరదు
అమ్మా! నీకు పాదాభివందనం!

 

కాలరెగరేసిన చెట్టు  - నవీన్‌ -  9553737304

ఎవరికిందా పడివుండక్లర్లేదని
కాలుమీద కాలేసుకుని కూర్చున్నది రోడ్డు
ఎన్నడూ దొరకని నిశ్శబ్దాన్ని
టేక్‌ ఓవర్‌ చేసింది ప్లైఓవర్‌
తపోవనంలో రుషిని తలపిస్తున్నది మైలురాయి

శుభ్రపడ్డ తన ఊపిరితిత్తులతో
గట్టిగా గాలి పీల్చుకుని
పరవశించింది ప్రాణవాయువు
ఆకాశం అద్దంలో
తనను తానే చూసుకుని
యవ్వనం తిరిగొచ్చిందని
మురిసిపోయింది నది
చేపపిల్లలకు చందమామను చూయిస్తూ
తన వొళ్ళో ఊయలలూపింది సముద్రం
అలికిడి లేక, అలజడి పడక
సూర్యుడితో సంభాషించింది ఉద్యానవనం
నల్లమబ్బులు తొలగి
వందమైళ్ళ దూరం చెరిగి
జలందర్‌ వాసికి దర్శనమిచ్చింది హిమవన్నగం
పర్యావరణమంతా పరిశుభ్ర ఆవరణైనందుకు
నేలమెడలో చినుకుపూలదండ వేసింది నింగిమేఘం
నడచివస్తున్న వలసకూలీలకు
గొడుగుపట్టి
కాలరెగరేసింది చెట్టు...

 

పట్టాల కింద దేశం - శిఖా-ఆకాష్‌ 9381522247

పొట్టను కాళ్లకు కట్టుకుని
ఇంటిని..ఇల్లాలినీ... ఊరునీ
తలపై పెట్టుకుని చీమలదండోలె
ఆశల రెక్కలల్లాడిస్తూ...
బ్రతుకు కాలి
చెమట నెత్తురుల ప్రవాహమై
సాగిపోయిన కాలం పేరు
ఆకలి కూలి !-
్జ
విషపు పురుగు నుండి
విషపు గాలి వరకు
ఎటునుండి ఎటు కదిలినా
కనిపించని ఆపదేదో..
చావు గంటరు మ్రోగుతున్నది!?
్జ
ఆకలీ.. ఆకలీ...
నీవెంత కనికరంలేని దానివే..!
మనిషి చావుకు కోటానుకోట్ల
ఎక్స్గ్రేషియాలుగా
ప్రకటించే దేశంలో
బతుక్కి ఆసరా కాలేని ప్రభుత్త్వాలే...ఎప్పటికి
చావు డప్పు మ్రోగించే యములోళ్లు!
కాసేపు నెపం మహమ్మారి
ఆకలిమీదో..
కనపడని మహా మహమ్మారి
కరోనా మీదో నెట్టేద్దాం-
్జ
పేదలబతుకులు చిగురించిన
గాయాలైనా గానీ
ఆకలికి పరిష్కారమేది?
కాలమే ఒక ప్రశ్నయి
సమాధానాల్లేని
ఒకానొక నిర్బంధ జాలం.
కన్నతల్లి చూపైనా లేదు.
జన్మభూమి వూపిరైనా తాకలేదు!
్జ
భరోసా లేని పరాయి చోట
తెల్లారితే నేనేమిటో... జీవితం
అభద్రతావలయంగా
భయపెడుతున్న చోట
నిద్ర కిటికీలు మూసి
చావు తలుపులు తెరిసి
తెల్లారగట్ట బతుకు తెల్లారిపోయే దారేదో
వెతుక్కున్నారు!?
్జ
చిరునామా లేదు!
నా దేశం రైలుపట్టాల క్రింద
సమాధికావడం పేరు
వలస!?
తెల్లవారుజాము
మనిషి నెత్తురోడటం పేరు
ఆకలి!?
్జ
యిది ముమ్మాటికీ
ప్రభుత్వ హత్యేనని
కరోనా పాఠం!.

 

కరోనాను బొందవెడ్దాం - పున్నమి వెంకటయ్య - 9581235315

ఏం కాలమొచ్చేనమ్మా!
ఇల్లు వోకిలూడ్సి రొండు దినాలాయే
ఎద్దులకాడ పెండకసువూడ్వనీకే వోలే
బర్లకు పాలువిండ్దమంటే భయం
ఏం బీమారమ్మా! గీ బీమారికింగ్లంబెట్ట!
ఎవడు జేసిన కంపో!
మనకందర్కి జుట్టు కొని గద్లం గద్లం జేస్తుంది
గిప్పుడంతా యాడజూసిన గిదే ముచ్చట
యా ఇంట్ల జూసిన గీ కర్రే పురుగు ముచ్చట్లే
బిడ్డను మనుమిచ్చుడు మర్సిండ్రు
కొడుక్కి బాసింగ బలం జూసుడు లే
నిన్న మొన్నట్దాక పైసలు సంపాదించాలన్నోడు
గిప్పుడు పానం పైలంగుటే జాలనుకుంటుండు
నిన్నట్దాక టైం లేదన్నోడు
గీపొద్దు పొద్దట్నుంచి కాలు బయట వెట్తే అడ్గు
పిల్లలైతే మస్తు ముర్సిపోయిండ్రనుకోండ్రి
అవును మరి గాళ్లతో ఆడ్కోన్నికే గిట్లనన్న
పొద్దు జిక్కినందుకు పోరగాళ్ళుగూడా మస్తుకుసైండ్రు
యాదమర్సిన యతలుగితలన్ని మతికొచ్చి
యాసర్కొచ్చినంతసేపు యాజేసుకునింటరు
మందు టానిక్‌ లేని గీ కర్రేపుర్గు బీమార్ని బొందవెట్టాలి
అంద్రం గుబుల్వాడకుండా పైలంగుందాం
పసివిల్లల్ని పండుముసల్లోల్లను మరింత పానం బెడ్దాం!
పానాలుంటే గీ పండ్గలు పంచన్లు మల్లజేసుకోవచ్చ
పెద్దలు జెప్పిన మాటలు పెడసెవిన వెట్టకుండా
గీ బేకారి బీమార్ని బేశర్తుగా బొందవెడ్డాం!

 

ఔను.... వారు కరోనాను జయించారు! - సరికొండ నరసింహారాజు9398254545

కనపడని శత్రువుతో
బతుకు యుధ్ధం చేస్తున్నప్పుడు....
నిబంధనల నీతివాక్యాలను ముక్కలు చేయడం
బయట అడుగు పెట్టడం ఒక భస్మాసుర హస్తమే!
యుధ్ధభూమిలో తీసుకున్న నిర్ణయం సరిచేసుకోలేనిది అన్నట్టు....
నా కాళ్ళ కింద కరోనా బాంబు పేలనే పేలింది!
కరోనా పాజిటివ్‌ అన్న పచ్చి నిజం...
నన్ను ఐసొలేషన్‌లో బంధించింది!
కాలంబోనులో దోషిలా నేను...
గాయపడ్డ ఒంటరి పక్షి లా నేను...
ఈ జీవన్మరణ పోరులో
బతుకు బలిపీఠంపై నిలబడ్డాను
భయం, భద్రతల నడుమ నలిగిపోతూ...
మానవతా రెక్కలపై వచ్చిన దేవతలల్లే వైద్యులు
వారి సేవలపాత్రలలో అమతం త్రాగించారు!
వారి ప్రాణాలొడ్డి నా ఊపిరి దీపాలు నిలిపారు!
అగ్ని పునీతమై పునర్జన్మ ఎత్తాను!
ఔను! నేను కరోనాను జయించాను!
జీవనదిలా ప్రవహించే వారికి జేజేలు...
దాతత్వంలో వున్న ఆనందం దాచుకోవడంలో ఏది!
చెట్టులా పచ్చదనం పంచేవారికి జేజేలు...
సేవించడంలోవున్న ఆనందం సేదతీరడంలో ఏది!
అవనితల్లిలా అమ్మతనం చూపేవారికి జేజేలు...
త్యాగించడంలో వున్న ఆనందం భోగించడంలో ఏది!
మనిషి పద్యం ప్రతిపదార్థమై జీవించడంలో ఆనందం
జీవించినా మరణించడంలో వుంటుందా...
వల్లకాటిని సైతం పూలవనాలుగా మార్చి
శవంగుడ్డను శాంతి జెండాలుగా ఎగరేస్తూ
పాడెలను మానవతా పల్లకీలుగా చేసే
సంజీవినీ విద్యేదో ఆ ప్రాణదాతల చేతుల్లో వుంది!
కరోనా రోగుల పట్ల వివక్ష చూపని
వారి సేవారాగానికి బందగానం పాడుదాం!
మార్పును ఆహ్వానించనివాడు
మనిషెట్లా ఔతాడు!
నా అడుగుల అద్దంలో నన్ను నేను చూసుకుంటూ
మట్టిగా పరిమళించే మనిషినై
కరోనా రోగుల సేవలో పునరంకితమవుతూ
నేడు సరికొత్తగా మొలకెత్తుతున్నా!
కరోనా లేని లోకాన్ని స్వప్నిస్తూ
కరుణ నదులై ప్రవహించడమే ...
నేడు మనిషిముందున్న తక్షణ కర్తవ్యం!!

 

లాక్డౌన్‌ కాలం - ఆవుల చక్రపాణి యాదవ్‌9963350973

భయం భయంగా నడుస్తుందీ ప్రపంచం
రోడ్లపై మాట్లాడే మనుషుల్లేక
దినదిన గండంగా గడుస్తుందీ కాలం
రోడ్లపై మత్యువు నడుస్తుండగా
్జ
ఎక్కడి వారక్కడ స్వీయ బందీలై
సూక్ష్మ శత్రు దాడికి బెదిరి
సాలెగూడులో చిక్కుకున్న పురుగులా
గిలాగిలా తండ్లాడుతున్న జీవితాలు

చూసిన చానెల్‌ చూస్తూ విసిగి పోతూ
లాక్‌ డౌన్‌ కాలం కథలు కథలుగా
ముందు తరాలకు చెప్పుకోవడానికి
ఒక ఘనకార్యంగా పనికొస్తుంది
్జ
తినను తిండి లేని కూలీ బతుకులు
చేతిలో చిల్లిగవ్వ లేని చిల్లర బతుకులై
మలమల మాడే కడుపుమంటకాహుతై
పేదల ఆకలికేకల చావులే
కరోనా చావులకంటే ఎక్కువౌతాయేమో!

శవాలగుట్టలు చరిత్ర సాక్ష్యంగా నిలిచిపోతాయి
లాక్డౌన్‌ కాలం పాఠ్యాంశాలుగా
ముందు తరాలకు చెప్పుకోవడానికి
్జ
రోగుల ప్రాణాలకు తమ ప్రాణాలొడ్డు వైద్యులు నర్సులు
యమునికి ఎదురునిలిచే పోలీసులు
శత్రువును తరిమేసే పారిశుద్ధ్య కార్మికులు
కనిపించని శత్రువుతో పోరుకు వేల వందనాలు

సర్వ మతాల దేవుళ్ళు తలుపులేసుకుంటే
కష్ట కాలంలో మానవత్వం మాత్రమే ముందుకొచ్చింది
నిస్వార్థ భావన నిజరూపమై నిలిచింది
లాక్డౌన్‌ కాలం మనిషిని మనిషిగా మార్చింది

 

ఎర్రని పాద ముద్రలు - ఎస్‌. ఏం. సుభాని9490776184

కర్కశత్వం
కరోనాది మాత్రమే కాదు
ఆకలిది
బీదరికానిది కూడా

ఆకలి
ఎండిన డొక్కల్ని తొలుస్తుంటే
పేదరికం
బతుకుని పరిహాసం చేస్తుంది

పట్టెడు మెతుకులు
గుక్కెడు నీటిచుక్కలు
గుప్పెడు భరోసా కూడా అందని
ఈ బతుకు పోరులో

శ్రమజీవన సౌందర్య ప్రతీకలు
అస్తవ్యస్థ జీవితపు ఆనవాళ్ళై
బంధాలకై నిర్బంధాలను తెంపి
ఊరి జాడ వెతుకుతున్నారు

నెత్తిన బతుకు మూటలతో
చంకన ఆకలి ప్రాణాలతో
గర్భంలో రేపటిని మోస్తూ
పిల్లా జెల్లల్ని
తోపుడు బండై
భారంగా లాగుతూ
సొమ్మసిల్లుతుంటే
మండుతున్న ఎండ
బొబ్బలెక్కిన కాళ్లకు
కారం పులుముతుంది

కష్టాల కొలిమిలో కాలుతూ
వేల మైళ్ళ దూరం
నడిచీ.. నడిచీ..
నడిచీ.... నడవలేక
చిట్లిన పాదాలు చిందిన
రక్తం సాక్షిగా
నల్లని రహదారులపై
ఎర్రని పాద ముద్రలు.

 

కన్నీటిని తుడిచే చేయి - శ్రీలక్ష్మి చివుకుల9441957325

ఈ నిశ్శబ్దపు నిశీధిలో
అలుపెరుగని ఆ చేయి
తన పనిచేసుకుపోతోంది
అవును!
తను తప్ప ఎవరు చేయగలరు?
20 20 లో కూడా జరుగుతున్న
అన్యాయాలను
అక్షరబద్ధం చేయడానికి
ఆ చేయి పూనుకుంది
కరోనా రాక్షసి వచ్చి
ప్రపంచాన్నే కట్టడి చేసినా
విషాదాన్ని విలయాన్ని
కంటి ముందు నిలిపినా
అతివలపై ఆగని దాష్టీకాలను
ఆపలేని ఆ కలం
లిఖిస్తోంది నిశ్శబ్దంగా
రక్షణ దూరం పాటించమంటున్నా
యువతి కాని బాలికను
పెళ్లి పేరుతో
మూడు ముళ్ళ ఉరితాడు
బిగిస్తూనే ఉన్నాడు
వద్ధుడైనా పశువు కాబట్టి
కామవాంఛను తీర్చుకునేందుకు
బాలిక కూడా కానీ పసిపాపను
పొదల్లోకి లాక్కు పోతున్నాడు
గహ నియంత్రణ పేరుతో
తలుపులన్నీ మూసి
ఆ మగం రేయింబవళ్లు
ఆలి రక్తాన్ని ఆనందంగా
జుర్రుకుంటూనే ఉంది
తాళిబొట్టు మద్యం సీసా
ఎదురుగా పెట్టి
ఏదో ఒకటి ఎంచుకో అంటే
తాళిబొట్టు లాక్కుని
మద్యం సీసా కొని
నడిరోడ్డుపై చిందులేస్తూ
వికటకవినని మురిసి పోతున్నాడు
ఎర్ర ప్రాంతంలో మా ఇల్లుంటే
ఇది ఆగేది కదా! అని
మౌనంగా అనుకుంటూ
బయటకు వెక్కి వెక్కీ ఏడిచే
ఆ నిస్సహాయురాలి
కన్నీటిని తుడిచే చేయి ఏది?
ఆ చేయి లిఖిస్తోంది.
ఈ శతాబ్దపు
అతివల వెతలను
మరో శతాబ్దపు
మగువలు మాత్రమే
చదువుకునేందుకు వీలుగా
అక్షరబద్ధం చేస్తోంది.

 

దూరాంతరం - గరికపాటి మణీందర్‌-9948326279

సూర్యోదయానికి
నెత్తుటి పువ్వులైన పాదాలు ఎదురుకోలు
సొమ్మసిల్లిన ప్రాణాలకు
తారసపడని సాంత్వన
ఇప్పుడు కొలవండి
ఈ దూరాభారాలను ఏ కొలతల్లో
పిలుస్తారో చెప్పండి.
గంట గంటకు భారమవుతున్న కాలాన్ని
ఏ గడియారంలో బంధిస్తారో చూపండి.
చేయని నేరానికి
ఆకలి కిరీటం పెట్టుకొని
తనువంతా గాయాలతో
ఎవరి బతుకు సిలువను వారు మోస్తున్నారు కదా.
ఆచ్ఛాదన లేని చిరు పాదాల ప్రశ్నలు
అమ్మా..మన ఊరు వచ్చిందా..
నాన్నా..ఇంకెంత దూరం నడవాలి.
ఈ ప్రహేళికల చిక్కుముడి విప్పేదెవరు.
మార్గమధ్యంలో మత్యువు ఎదురుపడితే
ముడుతలు తేరిన నదుటిపై
రక్తచారికల ముద్దుపెడితే
ఈ దూరం తరగదు
ఈ అంతరము చెరగదు.

 

కాళ్ళు పాఠాలు చెబుతాయి - పొత్తూరి సుబ్బారావు9490751681

ఇప్పుడు కూడా
ఆ కాళ్ళు దూరంగా, దుర్బలంగా
సాగిపోతూనే వున్నాయి
అవి మోసే శరీరాలు
కాయకష్టం చేసి బక్కచిక్కటంతో
ఆ కాళ్ళకంతగా భారం అనిపించటంలేదు
పలుగూ, పారా - తట్టా, బుట్టా
పిల్లా జల్లలను మోస్తున్న దేహాలు
ఆ కాళ్ళకు నిస్సత్తువను ఆపాదించలేదు
వేసిన రైళ్ళనెక్కలేక
వెళ్ళే బస్సులనందుకోలేక
వేసారిన ఉదరాలకు తిండిలేక
ఆదుకునే నాథులందుబాటులో లేక
బాణంలా వంగుతున్న నడుములతో
నడుమ నడుమ అలసట తీర్చుకునే
ఆసరాలు అగుపించని రహదారుల్లోనూ
రైలు పట్టాలపైననూ
ఆ కాళ్ళు ముందుకు వెళుతూనేవున్నాయి
ఎన్నాళ్ళగానో వలస పక్షులుగా
బతుకెళ్ళబుచ్చుతున్నా
ఏదో దారిన స్వస్థలానికి చేర్చే
ఆ కాళ్ళకిపుడు కొత్త అనుభవం తోడైంది
కరోనాను ఖాతరుచేసే స్థితి
తమకెప్పటికీ లభించదన్న నిరాశతో
లాక్‌డౌనూ, సడలింపులూ
వాటి అర్థాలుకూడా తెలియని
అమాయక జనాన్ని మోసే
ఆ కాళ్ళు రాత్రింబవళ్ళు తేడాలేక
నడకసాగిస్తూనే వున్నాయి
వాగ్దానాలని నిలబెట్టుకోలేని
నాయకులకు దూరంగా
బడబాగ్ని జ్వాలలని భరిస్తున్న
వలస కార్మికుల జీవితాలకు
కాళ్ళు పాఠాలు చెబుతాయి
అవే పాలకులకెప్పటికైనా
గుణపాఠాలు చెబుతాయి

 

ఇక్కడ ప్రవేశం లేదు! - పుట్టపర్తి మల్లికార్జున - 9490439029

నెత్తిన మూటలతో ఆకలి మంటలతో
ప్రాణాలరచేత పట్టుకుని కదిలే సముహాలు లేని
చంటి బిడ్డల శూన్యపు పొట్టను నింపేకి
ఎండిన రొమ్ముని నోటికందించే అమ్మలు లేని
ఇంటిలోనే బందీలుగా బతికే అవస్థల్లేని
ఆనంద ప్రపంచాన్ని నిర్మించేందుకు
నాతో వస్తారా!
ఆహ్వానించానే కానీ అందరికీ
ప్రవేశం లేదండోరు
విపత్తు గోతుల్ని పూడుస్తున్న సైనికులకు
రాస్తాలపై స్వేదంతో లక్ష్మణ రేఖల్ని గీస్తున్న రక్షకులకు
చెత్తను మోసుకెళ్ళే కార్మిక కర్మయోగులకు
కొండెక్కే ప్రాణ దీపాల్ని వెలిగిస్తున్న
వైద్య దేవుళ్ళకు
సహకరించని వారికి ప్రవేశం లేదు
విష రసాయనాలతో పంట
దిగుబడి పోటీలు పెట్టే
పర్యావరణాన్ని హరించి
జీవకోటికి హాని చేసే
స్వార్థపు పొరల్లో ఇంకిన
దాతత్వాన్ని తవ్వి తీయని
వలస కార్మికులకు
కాసింత మానవత్వపు లేపనం రాయలేని
వారికి ఇక్కడ ప్రవేశం లేదు
మూతికి ముసుగు చేతికి తొడుగు లేకుండా వచ్చే
కాలుష్యాన్ని కల్మషాన్ని తొలగించుకోని
చేతుల్ని చేతల్ని శుభ్రపరచుకోని
ఆలింగనాలకు కరచాలనాలకు ఆరాటపడే
సామూహిక విందులు వినోదాలకి వీడ్కోలు పలకలేని
లాక్‌ డౌన్‌ క్వారంటైన్‌ లను స్వచ్ఛందంగా పాటించలేని
వారికి ఇక్కడ ప్రవేశం లేదు

 

ఎవరిదీ చూపు - విజరు కోగంటి 8801823244

తటిలో కత్తి వేటుకు తప్పించుకుని
పారిపోతున్న వాడిదో
అందని వాడిని చూసి నిట్టూర్చిన కత్తిదో

వువ్వెత్తున లేచి ఎగసి విరిగిపడుతున్న కెరటం కింద
నిస్సహాయంగా మునుగుతూ చూసిన వాడిదో
ముంచెత్తుతూ కరీరంగా నవ్విన పడగవిప్పిన అలదో

విరిగిన బతుకు బండిని మోస్తూ
ఇంటి వైపు తిరిగిన పాదాల కూలిన కలలదో
వలస వలలను అల్లిన కనపడని చేతులదో

జీవితపు సాహససంద్రాన్ని దాటి
యాత్ర చివరన ఇంటి ముందే కుప్పకూలిన పసికళ్ళదో
ఆ పాదాలను పొదువుకోలేకపోయిన వారి గుండెలదో

తగలబడుతున్న నగరం ముందు కూచుని
వాయిద్య వినోదాన మునిగిన నియంతలదో
చూసి ఏమనలేక ఆక్రోశిస్తున్న దీనులదో

ఎవరిదీ చూపు?

 

ఎంతెంత దూరం? - యు. సోమకుమారి9290463352

కాలాలు మారినా పాలకులు మారినా
మారనిదీ కూలీ బ్రతుకు
ఉన్న ఊళ్ళో ఉనికి లేక
పనికి పై ఊరు పయనిస్తే
'వలస కూలీ'లన్న బిరుదు ఇచ్చి
భరోసా లేని జీవితాన్నిచ్చారు
కరిగిన కొవ్వొత్తి తరహాలో
లోకానికి వెలుగునిచ్చి
తాము మాత్రం చీకటిలో మగ్గారు
ఈ శ్రామికవర్గం లేనినాడు
వజ్రాలున్నా వ్యర్థమేనని
ఎప్పుడర్థమౌతుందీ లోకానికి!
అన్ని రంగాలకూ అందమైన 'రంగవల్లు'లద్ది
తాము మాత్రం
కారు 'నలుపు'లో నిద్రించే వేళ
కరోనా కొరడా ఝళిపించి
జీవితాలను ఛిద్రం చేస్తుంటే
తనవారి చివరి చూపైనా దక్కుతుందనే
దృఢ నిశ్చయంతో
ఎంతెంత దూరం? కాస్తంత దూరమంటూ
నడిచి నడిచి నడిరోడ్డే నట్టిల్లయి
ఫుట్‌పాత్‌లే పట్టుపరుపులుగా పడుతూ లేస్తూ
గుక్కెడు నీళ్ళ కోసం గుటకలు వేస్తూ
పయనిస్తున్న శ్రామికులను
గుర్తించలేని గుడ్డిదయిందా ఈ ప్రభుత్వం
రైతుకూలీ రౌద్రుడైతే రూకలున్నా నూకలుండవనే
నిజాన్ని గ్రహించి గౌరవించి గుడికట్టక్కర లేదు
దారి చూపించి జీవితాన్ని నిలబెట్టగలిగిన నాడు
మానవత్వం మొలకెత్తి మహావృక్షమై పరిమళిస్తుంది

 

తల్లివేరు తలపులో - దామరకుంట శంకరయ్య9440876788

అక్కడి పలకరింపులో జీవం
అక్కడి కలివిడి తనంలో లౌకికతత్వం
అక్కడి మనుషుల్లో మానవతా పరిమళం.
దేశాలెన్ని చుట్టినా!
పైచదువులు ఎంతదూరం నడిపించినా
పైరగాలికి తలలూపే పంటచేలు
లేత కొబ్బరి నీళ్ళవంటి తీయని వాగులు
అందమైన సూర్యోదయం
గోధూళి
మనసులో చెదరని చిత్రాలుగా.

బడి సోపతి గాల్లు
గుడి భజనలు
చెరువులో చేపపిల్లలా ఈత
అడవి పండ్ల యాది
పిల్లలకు పిట్ట కథలుగా
అమ్మ చీరసింగులు పట్టి నడిచిన ఇల్లు
నాన్న అడుగుల్ని అనుసరించి నేర్చిన ప్రకతి పాఠం
ఉన్నతికి మూలమైన మూలం
కంటిమీద కునుకును
అప్పుడప్పుడు మాయం చేస్తుంది.
పుట్టిపెరిగినం కదా!
స్మరణకు రాకుండ ఉండలేం!!
ఎంతిష్టమో
బాల్యపు మడుగులో మునకేసి
తనివితీర తామర్లను తడమడమంటే.
ప్రపంచీకరణ మాయంచేసిన
ప్రతి దశ్యం తైలవర్ణ చిత్రం.
మార్పు అనివార్యమైన సందర్భం
ఇంకా ఏమేం చూస్తామో!

నా ప్రయాణం నాకోసం మొదలై
మా కోసంగా మారింది.
వలస పోయిన కోయిల
వసంతంలో తిరిగొచ్చినట్టు.
ఉనికిని ఉగాది తోరణంలా
ఊరి గుమ్మానికి కట్టాలి.
వెళ్ళిరావాలి
గిట్టని ఆ నేలపైకి
పుట్టిన ఆ స్వర్గసీమకు

కొత్తపాఠంఈతకోట సుబ్బారావు9440529785

పాదుల నిండా శ్వాసల ఛాయలు
పొదలమాటున నిశ్వాస జాడలు
నేలతల్లి ఆగ్రహం
ప్రకతి కరాళ నత్యం
వెరసి చిన్నా భిన్నమై
చెల్లాచెదురైన గులాబీ తోట
భారత్‌ గుండెనిండా
ఎన్ని ముళ్ళ గులాబీలు.
్జ
భూమాతా!
ఈ జన్మకేమి కావాలి
బుక్కెడు బువ్వ
జానెడు జాగా
రెల్లు గడ్డి గుడిసె
భారత్‌ బంతి తోట
బీటలు బారింది.
్జ
కాందిశీకుల మయ్యాము
పరదేశస్తుల్లా
బిక్కుబిక్కు మంటున్నాం
ఇక కూలడానికి
రాలడానికి
జీవించటానికి
ఇక్కడ బతుకులు మిగలడం లేదు
ఈ శిధిలాలు
ఈ కళేబరాలు
ప్రపంచ పంజరం
గాయాల పాలైంది.
్జ
సూక్ష్మజీవి ఆశీస్సులతో
ఊరి బయట క్షేమంగా ఉన్నాము
ప్రకతికి చేసిన పాపంతో
పొలిమేరల్లో పహారా కాస్తున్నాం
స్మశానం నిశ్శబ్దానికి .
శిధిల వర్గానికి
ప్రతీకలుగా నిలుచున్నాం
నాలుగు గోడల నడికప్పున
శానిటైజర్‌ పట్టుకొని
యుద్ధం చేస్తున్నాము.
్జ
చేతులు శుభ్రపరచుకోవడానికి
మిగిల్చిన ఈ ఈ రెండు చేతులే
కరోనా చిలకకు ప్రాణ గండం.
్జ
దేశవిదేశాల్లో
మునక లేసినందుకు
పాపాల మచ్చల్లా మిగిలి ఉన్నాయి.
ఈ ప్రభుత్వ దవాఖానాలు మాత్రం
పవిత్రంగా అక్కున చేర్చుకుంటున్నాయి.
్జ
ఈ మతుల సంఖ్య
లక్ష రెండు లక్షలా
కాకి లెక్కలు అధికారులు నొక్కులు
పోటాపోటీగా
ప్రపంచ వాకిట ముందు
నిలువెత్తు చిలక ప్రశ్న .
్జ
దేశం నిండా
ఉచిత జనాభా ఏమయిందో
రైళ్లు బస్సులు సినిమాలు
పబ్బులు క్లబ్బులు బోసిపోయాయి
బాధితు లెవరో
బాధాతప్త హదయాలెవరో!
మర్మమైన మనుషులు
మలినమంటిస్తున్న వైరసులు.
సూక్ష్మ జీవాల కింద
ఇంకా నలుగుతున్న
బ్రతికున్న శవాలు
ప్రవేటు వైద్యుల కాసుల ఖజానాలు
పక్కున నవ్వు కుంటున్నాయి
ఈ మానవుల ప్రకతి వైపరీత్యానికి
పోటీకి దోపిడీ కు
మగాల్లాంటి గబ్బిలాళ్ల ఆలోచనలకు
దేశ మాత కంఠానా
చెదిరిన కరోనా దుఃఖహారం.
రండి..భారతీయులారా
రండి మానవతావాదులరా
రెండు చేతులకు పని పెడదాం
నాలుగు గోడల మధ్య నిశ్శబ్ద యుద్దం చేద్దాం
రండి ఓపిక ఓర్పులను చేపడతాం
తలా కొంత భారం పంచుకుందాం
కరోనాను కొనగోటితో తరిమేద్దాం
పాఠాలుగా వారసులకు చెబుదాం

 

ఆలో లక్షణా అన్న శోకాలు ... - సి.హెచ్‌.వి. లక్ష్మి - 9493435649

ఎండలు ఎప్పటిలానే మండు తున్నాయి
కరువు కాటకాలు కరోనాతో జత కట్టి
కల్లు తాగి తైతక్క లాడుతున్నాయి
చుక్క నీటి కోసం సీమ
మబ్బుల వైపే చూస్తూ కూచుంది
ఉత్తరాంధ్ర ఉక్కతో ఉక్కిరి బిక్కిరవుతూ
కరోనా విరుగుడు కషాయలకోసం లైన్‌ కట్టి
గిన్నీసు బుక్‌లో చేరి రికార్డ్‌ సష్టించింది
గొంతు తడుపుకుందికి నీటి చుక్క లేక
పోయినా పర్లేదు, కరోనా కౌగిలించుకున్న
అస్సలు పర్లేదు ఒట్టి మందు సుక్క వుంటే సాలనే
అమాయక కధల వెనుక దాగిన
ఆకలి కేకలగూర్చి ఆలోచించే బుర్రలేవి
స్మార్ట్‌ సిటీలలో రిలీజ్‌ అయిన వలస సిత్రాలు
నడి రోడ్లపై, రైలు పట్టాలపై, అడవులలో
బాక్స్‌ ఆఫీస్‌ బద్దలుకొట్టి నిల్‌ కలెక్షన్‌లతో
ప్రపంచాన్ని హేళన చేస్తూ
వంద రోజుల అంకె వైపు
శరవేగంగా పరిగెడుతున్నాయి ....

చుట్టూ నీరే తాగటానికి చుక్కలేని
నిస్సిగ్గు నిజాలు ఎవరికి ఎరుక
ఆంధ్రుల అందాల విశాఖ చెప్పే కన్నీటి కథల
వెనుక వున్న వేదన చూడలేక
సమాజం సిగ్గుతో తలవంచక తప్పదు
జనాభా ఆకాశాన అడుగుకోసం
శరవేఘంతో దూసుకుపోతున్న వేళ
కరోన భూచికి జడిసి భూగోళం
ఎక్కడ దక్కోవాలో తెలియక
బావురుమని బాధాకరంగా ఏడుస్తోంది
బొరియల్లోని ఎలుకల్లా
భూగర్భ జలాలు కాలుష్యం కోరలలో దాగి
ప్రాణాలను తోడేస్తున్నాయి
మేధావుల మాటలు పెడచెవిన పెట్టి
తణమో ఫణమో పుచ్చుకొని
బద్మాష్‌ కంపెనీలకు అనుమతి యిచ్చిన
ఘన చరిత మనకే సొంతం
శీతల పానీయాల కంపెనీలు
భూగర్భ జలాలను రంజుగా ఆర్చేస్తుంటే
అస్సలు పట్టించుకోని మహానుభావులం

నీటి నిల్వలు విషగాలులను వెదచల్లుతుంటే
ఊర్లు ఊర్లు ఆలో లక్షణా అని సోకిస్తున్నాయి
పడిన చిట్టి చినుకులతో కళకళ లాడే
మంచి నీటి చెరువులు కబ్జా దారుల కౌగిట్లో
కమ్మగా కరిగి కలసి పోయాయి
నేల నెర్రలుబారి తిక్కవేషాలు వేస్తూ తొక్క తీస్తోంది
గుక్క నీటి కోసం పడరాని యిక్కట్లు
కాంక్రీట్‌ జంగల్‌ లోని జీవులు
దాహంతో తల్లడిల్లుతున్నాయి
ఎటు చూసినా అవే కన్నీళ్ళు అవే కష్టములు
గంగమ్మ తల్లికి మరోసారి బ్రతిమాలి తెచ్చే
భగీరధుని కోసం మరో వంద ఏళ్ళు
వెతుకులాట మరీ వెటకారంగా వుంది
జారే ప్రతి చినుకును ఒడిసి పట్టి భద్రపర్చే దిశగా
ప్రణాళికలు వెంటనే సిద్దం చేసే వేళయిది ....