కవితలు

పుస్తకం - ఈదర శ్రీనివాస రెడ్డి

బతుకు నిమజ్ఞనం - కాంచనపల్లి ద్వారకానాథ్‌
సడలకుండా చూసుకోవాల్సిన చేయి - గన్‌రెడ్డి ఆదిరెడ్డి
ఇద్దరి కథ కాదు - వశిష్ట సోమేపల్లి
నీటిచెమ్మ - చందలూరి నారాయణరావు
నా అడుగులు చీకటివైపు - మహబూబ్‌ భాషా చిల్లెం
నీవో అద్భుతానివి - కళ్యాణదుర్గం స్వర్ణలత
కృష్ణపక్షం - గోపాలరావు కందిపాటి
ఇప్పుడేం కావాలి - విజయ్ కోగంటి
నానీలు - సుభాషిణి ప్రత్తిపాటి
నానీలు - ముట్నూరు బాలసుబ్రహ్మణ్యం
జోహార్‌.. - సందీప్‌ రుద్రాక్షుల

పుస్తకం
- ఈదర శ్రీనివాసరెడ్డి - 7893111985


మట్టి మెదళ్ళలో
ఆలోచనల విత్తనాలతో
సాగిన అక్షర సేద్యానికి
ప్రతిఫలమే ప్రతి పుస్తకం
అంతరంగ సాగరంలో
సాగిన అంతర్మథనంలో
ఉద్భవించిన అమృత
బాండమే ప్రతి ప్రబంధం
అణగారిన గుండెలోతుల్లో
వెలికి రాని భావాల
ఆణిముత్యాల మణి
హారమే ప్రతి పర్వం
అక్షరాల పూలతోటలో
సాహితి తుమ్మెదలు
పోగేసిన మకరందాల
తేనె పట్టు ప్రతి కావ్యం
మరపురాని జ్ఞాపకాల
లోగిలిలో రెపరెపలాడే
అక్షర తోరణాల
సమారోహమే ప్రతి సర్గం
అజ్ఞాన తిమిరంలో
కొట్టుకుపోతున్న యువతకు
మార్గం చూపే చిరు దివ్వెల
వెలుగే ప్రతి శాస్త్రం
అనుభవాల మూకుళ్ళలో
జీవిత సత్యాల తాళింపులతో
కల బీములు వండి వార్చే
వంటకమే ప్రతి గ్రంథం
మూఢనమ్మకాల మత్తులో
జోగుతున్న మస్తకాలను
తట్టి లేపే చైతన్యపు వెలుగు
బావుటానే ప్రతి పుస్తకం

 

బతుకునిమజ్జనం
- కంచనపల్లి ద్వారకనాథ్‌ - 9985295605


అక్కడ కొలువు తీరిన బొమ్మలు చూసిన
కనువిందు చేసే కళాఖండాలెన్నో
నిలువెత్తు వినాయకులే కాదు
పక్షులు, జంతువులు, పూలకుండీలైనా
సజీవ ప్రతిమలై శోభిస్తాయి
ప్రతిమ ఏదైనా అలవోకగా
రూపులు తీర్చి దిద్దగల విశ్వకర్మలే కాదు
వాటికి మెరుగులు దిద్ది వర్ణశోభితం చేసే
రవివర్మలు కూడా వారు
పార్వతి దేవి నలుగు పిండితో
వినాయకుని సష్టించింది ఆనాడు
వినాయకునికి ఎన్నో రూపాలు సష్టిస్తున్నారు ఈనాడు
రోడ్ల పక్కన షెడ్లు వేసుకుని
హస్తకళే బతుకు తెరువుగా నమ్ముకుని
రేయింబగళ్ళు శ్రమిస్తూ
కడుపు చేతబట్టి ఆకలితో
బతుకు మెతుకులకై పోరాడే వారి
కష్టాల కడగండ్ల కన్నీళ్లు చారికలు ఎవరు తుడుస్తారు?
కాలం తీసే పరుగు పందెంలో
కాసుల కోసం పరిగెత్తే లోకంతో పోటీ పడలేక
కాలం పెట్టె బాధలు లోకానికి కనిపించక గుండెల్లో దాచుకుని
నైరాస్యపు నిశమయ రాత్రులలో
రేపటి భవిష్యత్తు పై స్వప్న సౌధాలు కట్టుకుంటూ
నిద్రలోకి జారుకునే వారికి
వారు సష్టించిన దేవతలు కల్లోకి వస్తారా ?
వారి ఆకలి బాధ తీరుస్తారా ?
కళను నమ్ముకుని అమ్ముకుంటున్న
రెక్కాడితేకాని డొక్కాడని కళాకారులు వారు
ఊరేగింపులకు, ఉత్సవాలకు అందించే
ప్రతిమల తయారీలో
శ్రమకు తగిన ఫలితం లేక
బేరసారాలతో పండుగలు గడిచి పోతాయి
జీవిత చక్ర భ్రమణంలో రాత్రింబవళ్ళు కలలు కని
అలసిన నేత్రాలు వర్షించే కన్నీటిలో
బతుకు నిమజ్జనం చేసుకునే కళాకారులు వారు !

 

సడలకుండా చూసుకోవాల్సిన చేయి
- గన్‌ రెడ్డి ఆదిరెడ్డి - 9494789731


ఒక్కచేయి
పక్కకొరిగితే
ఎన్ని డొక్కలు ఎండిపోతరు
నాగలికి నడక నేర్పిన చేయి
పలుగు పార బట్టిన చేయి
మోట గొట్టిన చేయి
మొరం తవ్విన చేయి
నాట్లువేసి
కలుపుదీసీ
పంటను ఏపుగా బెంచిన చేయి
సెమట సుక్కలను
భూమి పొరల్లో ఇంకించి
బువ్వను అందించిన చేయి
జానపదుల బాణిలను వాణీలను
బతుకు పాటలుగా అల్లుకొని
చేను మధ్యలో
మంచెపై
వయ్యారంగా వడిసెల రాళ్ళను
రువ్విన చేయి
అస్సోరు దూలా బతుకమ్మ
ఆటపాటలకు మానవహారంగా
మల్చబడ్డ చేయి
బావులు తవ్విన చేయి
బండలు గొట్టిన చేయి
బడబాగ్నులను
గుండెల్లో దాచుకొని
బతుకు బాటలో
చేయూతనందించిన నేస్తం
మానవాళి మనుగడకు
సాక్షిభూతమైనది
చల్లగా కాపాడు కోవాల్సిన చేయి
సడలకుండా చూసుకోవాల్సిన చేయి

 

ఇద్దరి కథ కాదు
- శ్రీవశిష్ఠ సోమేపల్లి - 91 9966460536


అవును
నీకూ నాకూ మధ్యన
వేల ఎడార్ల దూరం వుంది
వేల ఏళ్ల మూర్ఖత్వానికి
సాక్ష్యంగా పరుచుకుంది.
అయినా
నిన్ను చేరాటానికేగా నా ప్రతీ అడుగు.
వెనుకున్న పాదముద్రలకీ,
ముందుకు పడే కొత్త అడుగులకీ
నువ్వు కుట్రలను ఆపాదిస్తే
మరో అడుగు పడేదెలా?
నడిచిన దారంతా
పడిన అడుగులు నావైనా
నీలో నన్ను చూసుకునే కదా వేసింది..
చప్పట్లు కొట్టమని నేనడగటం లేదే
చేయి చాచమనేగా నే అడుగుతుంది.

  •  

అవునూ
నీకూ నాకూ మధ్యన
వేల ఎడార్లు వున్నాయన్నావ్‌
నాకోసమే నీ అడుగులన్నావ్‌
కానీ వేసిన ప్రతీ అడుగూ
నా భుజాలపైనేగా..
అవును
నేను కుట్రలే వెతుకుతాను!
పుస్తకాల్లోని రాజ్యాధికారం
రబ్బరు స్టాంపుగా కుర్చీలో కూర్చుంటే
చంకల చప్పట్లు కొట్టుకోవాలా?
నా ఆహారం నీకు ద్రోహమైనప్పుడు
నీ ఆహార్యం
నాకు కుట్రగా తోయటం తప్పా?
నేల నీదై వుండొచ్చు
నేలని 'దానం' చేసి
నా వైపు అడుగులేస్తూ వుండొచ్చు
నీకు తెలియనిది ఒకటి చెప్తా విను
నేనూ నేలా ఒక్కటే..
మోస్తూనే వున్నాం
అణిచివేతల్ని, అవమానాల్ని, అంతరానితనాన్ని..
అయినా పర్వాలేదు..
నువ్వు వస్తానంటే
గాయాల చేతుల్ని నీదాకా
చాచే వుంచుతా

  •  

దూరాలు సరే..
అసలు మధ్యన
ఎడారెందుకు వుండాలి?
నాలుగు చేతులూ
నాలుగు చుక్కలు జల్లితే
అడవి అల్లుకోదా..
కొత్త వూపిర్లు అందివ్వదా..

 

నీటి చెమ్మ
చందలూరి నారాయణరావు - 9704437247


పలుగు-పార
రెండు చేతుల్లో
చెమటై చిందిన జీవితాలలో

ఊట-తేట
రెండు కళ్ళలో
గొంతు తడిసిన దప్పిక వేళలో
చెలమ- చెమ్మ
మది మడుల్లో
చల్లని దీవెనలా సాగిన జాలులో
ఊరిన ప్రతి చుక్కకు
ఎన్ని రూపాలో?
ప్రతీ రూపానికి
కోటి దండాలు.

  •  

బావిగా వెలసి
దాహం తీర్చింది.
చెరువుగా చేరి
చెమ్మను చాటింది.
కాలువగా కలసి
పంటకు ప్రాణం పోసింది

  •  

భూమికి
పైరు..పచ్చని ప్రాణం.
నింగికి
మబ్బు..మెరుపు..మురెపం
మనిషికి
బంధమే అందం..ఆనందం.

 

నా అడుగులు చీకటి వైపు
మహబూబ్‌ బాషా చిల్లెం - 9502000415


చీకటిని ప్రేమించినంత ఇష్టంగా
వెలుగును ప్రేమించను
బహుశా నీకు నేను
ఇప్పుడు అర్థం కాకపోవచ్చు
వెలుగులో వెతికితే నవ్వులే కనిపిస్తాయి
మరి చీకటిలో...?
దుఃఖాన్ని దేహాలకు తొడుక్కున్న
దీనులెందరో కనిపిస్తారు
కళ్ళలో బ్రతుకు కాంతులు లేని
నిర్జీవుల అవశేషాల ఆనవాళ్లు కనిపిస్తాయి
సమాజంలో అలసి సొలసిన
గుండెల గాయాలు కనిపిస్తాయి
ఆ చీకటిలోనే అణచివేయబడ్డ ఆత్మలు
నీకెన్నో చీకటి రహస్యాలు
చెవిన వేస్తాయి
నీవు ఇంకాస్త గమనిస్తే
ఆకలి పేగుల ఆర్తనాదాలు
అలవోకగా వినిపిస్తాయి
తరతరాలుగా తొక్కివేయబడ్డ
చరిత్ర పేజీలు
నీ చేతికి చిక్కుతాయి
ఇప్పుడు నువ్వు
వారి చరిత్రను విని
జాలిని చూపి
కన్నీటిని మాత్రం కార్చొద్దు
మసకబారిన వారి మెదళ్ళకు
కాసిన్ని అక్షరాలను అతికించు
నీకు వీలైతే, వారి మోములో
నవ్వులు పూయించాలంటే
నువ్వు ముందుండి
నాలుగు అడుగుల్ని కదుపు

అంతేగానీ...
అశ్రువుల కళ్ళను చూసి అవహేళన చేయకు
నేను నడిచే దారిని దూషించకు
నేనూ, నా అడుగులెప్పుడూ
చీకటి వైపేనని మరచిపోకు...

 

నీవో అద్భుతానివి
- కళ్యాణదుర్గం స్వర్ణలత - 98486 26114


నీవో అద్భుతానివి
ఎలాగో చెప్పనా !

నేటి క్షణాలు రేపటికి గతాలై
కళ్ళ ముందు నుండి కరిగిపోతుంటే
వర్తమానానివై భవిష్యత్తుకు సవాల్‌ విసురుతావ్‌ !
ఉప్పెనలా ఉవ్వెత్తున లేస్తున్న
ఉద్వేగాలను అరచేత్తో అమాంతంగా పట్టుకుని
నిబ్బరంగా నిలబడతావ్‌ !
అవధుల్ని దాటిన ఆశల్ని
ఆశయాలుగా మార్చి
అమితంగా శ్రమిస్తావ్‌ !
తెల్ల కాగితానికి మార్జినేసినట్టే
బ్రతుకు భయాలను
మార్జిన్ల బయటకు తోసి
స్వచ్ఛమైన జీవితాన్ని
ఎంచుకుంటావ్‌ !
ప్రతిజ్ఞలు లేని ప్రయత్నాలతో
ప్రతిసారీ నీవు
అవరోధాల్ని అధిగమిస్తావ్‌ !
పరిసరాలు
తెచ్చిపెట్టుకున్న నవ్వుల్తో
కత్రిమ రంగుల్తో
స్పర్శించలేని కరచాలనాలతో కనిపిస్తుంటే
నీవు వాలే భుజమై ఆసరా అవుతావు !
సామాజిక అనాసక్తి అసంతప్తి కూడా
అతి సహజమై సామూహిక నిర్జనత్వం ఎదురైనప్పుడు
గుండె నిండా గుప్పెడు ఆశతో ఎదురెళ్తావ్‌ !
ఒత్తిళ్లు ఒడుదుడుకులు
విశ్వమంతై విహరిస్తుంటే
నిబ్బరంగా లక్ష్యం వైపే పయనిస్తావ్‌ !

వాగ్ధానాలు చేయని సంతోషాలను
సమాధానాలు ఇవ్వని కోపాలను
నిర్ణయాలు తీసుకోని నిరాశా సమయాలను
మార్గాలుగా మార్చేసి
జీవితపు ఆటను గెలుపు బాటలో నడిపిస్తావ్‌ !

జీవితానికి మరికొన్ని కొత్త రంగుల్ని అద్దుతూ
ఇంద్రధనుస్సునే గుండెలపై పూయిస్తావ్‌
అంతెందుకు
అద్దాల మధ్య కాలాన్ని బంధించి
అరచేతికి అంగుళం పైన అట్టిపెట్టేస్తావ్‌ !
అందుకే
నీవో అద్భుతానివి !

 

ఇప్పుడేం కావాలి
విజయ్ కోగంటి  - 8801823244


రోదసి చీకటిలో
లోహవిహంగాలు ఇంకా దేనికో
వెతుకుతునే వున్నై
రాతికొండలనీ
వాడి ముక్కులతో రాబందులు
తొలుస్తూనే వున్నై
నిశిత దష్టితో
చక్కర్లు కొడుతూ
రెక్కలార్చని డేగలు
ఆదమరచి పరిగెడుతున్న కోడిపిల్లల్ని
అదనుచూసి పడుతూనే వున్నై
నంగి నవ్వుల మధ్య
మహా తంత్రపు చక్రపు మరలేవో
టకటకలాడుతూ
చుట్టుకుపోతూనే వున్నై

అయితే ఇంకా ఏదో కావాలి
ఇంకా ఇంకా ఏదేదో కావాలి
పూసి మారేడు చేసేందుకు
ఇంకొంచెం మసి కావాలి
గుట్టుచప్పుడుగా దొంగాటలో
కొండలు నదులు కొల్లగొట్టేందుకు
రంగురంగుల గంతలు కావాలి

వాన తడపడం
నిప్పు కాల్చడం
మహిమ కాదనీ
మనుషులు మనుషుల్లా వుండాలనీ
బానిసత్వపు బతుకు వద్దనీ
కరిచే కాలనాగుని మట్టుపెట్టమని
బుద్ధి వున్నందుకు ప్రశ్నించి తీరాలనీ చెప్పిన
ఒంటరి సోక్రటిసులను
బంధించేందుకు
ఇనుప చట్రాలు కావాలి
చంపేందుకు కాసింత విషం కావాలి

అమాయకుల్ని వెతికి మరీ
కొరత వేసేందుకు
ఇంకొన్ని శిలువలూ కావాలి

 

నానీలు
- సుభాషిణి ప్రత్తిపాటి - 8099305303

బడికి
తాళాలు పడ్డాయి!
పిల్లల అల్లరి
గట్లు తెగింది!!!

జబ్బు
తగ్గిపోయింది!
ఇరుగు పొరుగుల్లో..
అనుమానం పెరిగిపోయింది!!
జీవితపు
పుటల్లోకి చూశా!!
బాల్యమొక్కటే...
నెమలీకలా మెరుస్తోంది!

పెరిగిన
ఆన్లైన్‌ మోసాలు!!
బంగారు కంకణం పులి కథ
చెప్పటం లేదుగా!!


పూర్వం చేపలకోసం
వల!
మనుషులకు
మాటల వలలేస్తున్నారు

 

నానీలు
- ముట్నూరు బాలసుబ్రహ్మణ్యం - 9440745728
శాంతికపోతం
ఎగరకుండా చెరొ రెక్కా
లాగుతున్నాయి
ఇరుదేశాలు!

పట్టాలెక్కనున్న
ప్రైవేటు రైళ్లు!
ఏ రంగాన్నీ
వదలలేదు వీళ్ళు!!

ఫెయిర్‌ అండ్‌ లవ్లీ
పేరు మార్చుకుంది.
ముఖం రంగును
మారుస్తుందో? లేదో?

మండడం పెట్రోల్‌
స్వభావమైతే,
ధరలను మండించడం
పాలకుల స్వభావం!
వద్ధాశ్రమం
ముస్తాబైంది!
నేడు తల్లిదండ్రుల
దినోత్సవం!!

ఆన్‌ లైన్‌ పాఠాలు
చేతిలో సుద్దముక్క
జారిపోయినట్టు
రాత్రి కల!

పిల్లల్ని చేర్పిస్తేనే
ఉపాధ్యాయుని
మనుగడ
ప్రై'వేటు' వ్యాపారం!

అరగక ఒకడు!
జరగక ఒకడు!!
నడుస్తున్నారు
ఎవరి త్రోవల్లో వారు!

ఆరోహణ,
అవరోహణలు
ఇటు సంగీతంలో
అటు జీవితంలో!