విద్వేషాన్ని తరిమేద్దాం

భారత స్వాతంత్య్రం అమృతోత్సవాలు జరిగిన కొద్దికాలంలోనే దేశంలో రాజకీయ, సామాజిక ఉద్రిక్తతలు తలెత్తడం ఆందోళన కలిగిస్తోంది. ఎక్కడో కాకుండా హైదరాబాదులోనే వీటిని చూడాల్సి రావడం పొంచివున్న ముప్పును చెబుతుంది. రాజకీయాల్లో మతాన్ని జొప్పించడం వల్ల కలిగిన దురవస్థ ఇది. ప్రజలూ పార్టీలూ ప్రభుత్వాలు అప్రమత్తంగా వుండటం వల్లనే గతకాలపు విషాదానుభవాలు పునరావృతం కాకుండా ఆపడం సాధ్యమైంది. మున్వర్‌ ఫరూఖ్‌ అనే విదూషకుడు కార్యక్రమం చేస్తే అడ్డుకోవాలని చూడటం, అంతిమయాత్రలో భగవద్గీత వినిపిస్తే శవవాహనం టైర్లు కోసేస్తామని బెదిరించడం ఏవిధంగా సబబు? భగవద్గీతపై ఎవరికి గుత్తాధిపత్యం వుంది? అంతిమయాత్రలో వినిపిస్తే అది చావుగీత అవుతుందని చేస్తున్న వాదన ఎవరిని అవమానిస్తుంది? ఒక మతోన్మాదం ఇతర మతాలపైనే గాక స్వమతంపైనా పడుతుందనడానికి ఇదే ఒక నిదర్శనం. ఎప్పుడో గురజాడ చెప్పినట్టు ... చెట్టపట్టాలు పట్టుకుని నడవడం; అన్నదమ్ముల్లా జాతులు, మతాలు మెలగడం ఇప్పటి కర్తవ్యం. చాపకింద నీరులా అల్లుకుపోతున్న పునరుద్ధరణ ధోరణులను ఆమోదించడం గాక తిరస్కరించడం ప్రశాంతతకు మార్గం. లేకపోతే చార్మినార్‌ నుంచి జిన్నా టవర్‌ వరకూ ప్రతిదీ వివాదమే అవుతుంది. విపరీతాలకు దారితీస్తుంది. ఏం తినాలో, ఏం కట్టుకోవాలో, ఏం పాడాలో, ఏం రాయాలో, ఏం ప్రసారం చేయాలో కూడా మతవాదమే నిర్ణయించేట్టయితే - సమాజంలో ఎంపిక స్వేచ్ఛ, వాక్స్వాతంత్రం, సామాజిక సమానతలకు అర్థమే ఉండదు. అది పౌరుల రాజ్యాంగ హక్కులను కాపాడాలి గాని మతాల జాడలు వెతకడం ప్రజాస్వామ్యం కాదు. మన మీడియలో పెద్ద భాగం, పాలక పార్టీలు కూడా లౌకికతత్వం కోసం గట్టిగా పోరాడలేని నేపథ్యంలో ఉద్యమాలు, అక్షరాలే ఆ పనిచేయవలసి వుంటుంది.
అంతర్జాతీయ రచయిత బుకర్‌తో సహా పలు అవార్డుల గ్రహీత సాల్మన్‌ రష్డీపై అమెరికాలో జరిగిన ప్రాణాంతక దాడి ఇందుకో తాజాఉదాహరణ. ప్రతిభావంతమైన ఆయన రచనలు ప్రపంచమంతటా సాహిత్య జీవుల ప్రశంసలు, ఆదరణ పొందినా మతోన్మాదులకు అవే మింగుడుపడటం లేదు. ఆయన రచనలతో విభేదించే హక్కు ఎవరికైనా వుంటుంది గానీ, ఇరాన్‌ పూర్వపు మతనాయకుడు ఖోమేనీ మరణశిక్ష విధించాడని ఇస్లామిక్‌ ఉగ్రవాద సంస్థలు అమెరికాలో చంపబోవటం ఘోరం. అయినా ఎలాగో ప్రాణాలతో బయటపడటం కొంత ఊరట. ఆయన ఈ దేశంలో పుట్టిన బ్రిటిష్‌ అమెరికన్‌ అయినా ఈ దారుణాన్ని ఖండించడానికి కేంద్రంలోని మోడీ ప్రభుత్వం రెండు వారాలు తీసుకుంది. నరేంద్ర దబోల్కర్‌, కల్బురి, గౌరీ లంకేశ్గ్‌ వంటివారి హత్యలపై ఇంతవరకూ తేల్చని మతశక్తులు కూడా ఇంతకంటే భిన్నమైనవి కావు. మతం కన్నా మానవత్వం పైచేయి కావాలంటే మతసామరస్యం తప్ప మరో మార్గం లేదు. అసహనం, ద్వేషం ఎప్పుడైనా ఎక్కడైనా ఇలాటి పరిస్థితికే దారితీస్తాయని గుర్తించాలి.
కేంద్ర సాహిత్య అకాడమీ అవార్డులు పొందిన సీనియర్‌, యువ రచయితలకు ప్రస్థానం అభినందనలు.