సంపాదకీయం

సంఘర్షణ వేళ ... సాహిత్యరంగం పాత్ర

దేశం స్వాతంత్ర అమృతోత్సవాలు జరుపుకొంటున్న వేళ రైతాంగం భారత్‌బంద్‌ నిర్వహించింది. ఆసేతు శీతాచలం ఈ నిరసన ప్రతిధ్వనించింది. ప్రతిచోటా సామాజిక, రాజకీయ రంగాల్లో పునస్సమీకరణలూ, కొత్త కదలికలూ కనిపిస్తున్నాయి. క రోనా గుప్పిటినుంచి ఇప్పుడిప్పుడే విడుదలవుతున్నామన్న ఆశతో ప్రజలు మళ్లీ సాధారణ జీవితంలోకి ప్రవేశిస్తున్నారు. 9/11 తర్వాత టెర్రరిజంపై పోరాటం అంటూ అమెరికా నాయకత్వాన సాగిన ఆధిపత్య వ్యూహాల పర్యవసనాలు ఇప్పుడు ప్రపంచం ముందున్నాయి. అంతర్జాతీయంగానూ ఆఫ్ఘనిస్తాన్‌ పరిణామాల వంటివి ఆందోళన కలిగిస్తున్నాయి.ఇలాటి తరుణంలోనే కవులు, రచయితల పరిశీలన పదునెక్కాల్సి ఉంటుంది.
ఈ మధ్యనే కేంద్ర సాహిత్య అకాడమీ అవార్డు తీసుకున్న కవి నిఖిలేశ్వర్‌ రచయితలను ఎపి, తెలంగాణ పాలకులు కొనేస్తున్నారని ఆరోపించారు. ఈ సమస్య ఎప్పుడూ ఉంటూనే ఉంటుంది. సంఘర్షణాత్మక, సందిగ్ధ దశలో మానవాళికి సంఘీభావంగా నిలిస్తేనే సాహిత్యం సార్థకమవుతుంది. ఇందుకోసం నడుం కట్టిన కవులూ, కళాకారులూ వివిధ రూపాల్లో పాలకుల వేధింపులకు, నిర్బంధానికి గురవుతూనే ఉన్నారు. వారిని కాపాడుకోవడానికి, ప్రజల పోరాటాలకు అండగా నిలవడానికి సాహితీ స్రవంతి, సాహిత్య ప్రస్థానం ఎప్పుడూ సిద్ధంగా ఉంటాయని మరోసారి ప్రకటిస్తున్నాం. మాలపల్లి నవల శతవార్షికోత్సవాలు నిర్వహించడం, ప్రత్యేక సంచిక ప్రచురించడం ద్వారా నాటి నుంచి నేటివరకూ సాగుతున్న ప్రజాసాహిత్య సంప్రదాయాలను మరోసారి స్మరించుకుందాం.
్జ్జ్జ
రెండు రాష్ట్రాల్లో తెలుగు భాష పరిరక్షణ కోసం హైదరాబాద్‌లో ఒక వేదిక ఏర్పాటు చేసుకున్నారు. ఉప రాష్ట్రపతితో సహా ఆ మాటే అన్నారు. తెలుగు మీడియానికి అసలు ఎసరు పెట్టారన్న నేపథ్యంలో ఎపి ప్రభుత్వం కూడా కొన్ని కార్యక్రమాలు చేసింది. వాస్తవమైన మార్పు దిశలో అడుగులు ఏ మేరకు పడేది చూడవలసివుంది. వెబ్‌లో చర్చ లూ ప్రసంగాలూ కొనసాగుతున్నాయి. ఇదంతా భాషాసాహిత్యాభిమానులు స్వాగతించే విషయం. ఇవి ఇంకా విశాలం, అర్థవంతం కావాలి. దీన్ని ఎలా ముందుకు తీసుకుపోవాలన్నది మన ముందున్న ప్రశ్న.