ఈతకోట సుబ్బారావు
94405 29785
క్షణం ఆగుతావా
పంచభక్ష్య పరమాన్నాలు వడ్డిస్తాను
క్షణం ఆగుతావా
దాహానికి అమృతం అందిస్తాను
పొయ్యిమీద ప్రెషర్‌ కుక్కర్‌ విజిల్‌
మిక్సర్‌లో మసాలా మెదిలే బ్రిగిల్‌
నల్లధనం బయటికి వచ్చే లోపల
తెల్లదనం దేశాన్నేలే మీదల
లక్షలు నీ ఖాతాలో జమ చేస్తాను
క్షణమాగుతావా?
రైతుని కొత్త విత్తనం ముంచితే ముంచనీ
మార్కెట్లో సరుకు నిల్వ పేరుకు పోనీ
పూట బత్తెం పోతే పోయేదేం లేదు
ఒక్కదినం పడికాపులతో చావు రానేరాదు
కార్మికులు శ్రామికులు కూలీలు హమాలీలు
చేనేతలు నాట్లు వేసే నాంచారీలు
కోత కోసే గొల్లభామలూ
మధ్య తరగతి పేద బిక్కీ,
కూర్లమ్మే కోయబిడ్డా
వీళ్లంతా ఎవరిని ?
ప్రజాస్వామ్యపు పట్టుగొమ్మలు
ఈ సామాన్యుల కోసమే ఆర్థిక విప్లవం
బ్యాంకుల ముందు క్యూ కడుతూ ఉండు
చూస్తూ ఉండు కల సాకారం చేస్తాను
క్షణం ఆగుతావా?
ఒకరిద్దరు సమిధులైతేనేం?
మహిళలు వృద్ధులు అవస్థ పడితేనేం
జాతి హితంకోసం రోగులు బాధపడితేనేం
దేశ క్షేమపు దారిలో ...
దివ్యాంగులు దిగులు పడితేనేం
కష్టం నష్టం పెళ్ళీ తల్లి అంతా మాయ
మనముంటే నేం పోతెనేం?
రేపటి తరం సౌఖ్యం ముఖ్యం
అదిగో స్వర్గం కళ్ళ ముందరే ఉంది
వసంతాన్ని వాకిట్లో నిలబెడతాను క్షణమాగతావా?
ఏటీయంలు నోట్ల మార్పిడి చత్‌ చట్‌
రూపే కార్డులు ఫోస్‌ మిషన్లు
మొబైల్‌ బ్యాంకింగ్‌ ఇన్ని ఉండగా
వొక ముద్దే కదా మొండి కడుపుకి
దేశం గొడ్డు పోలేదోరు
నాలుగు రోజులు ఓపిక పడితే
పోయేదేముంది కష్టాలు తప్ప
బడాబడా తిమింగలాలకై
చిన్న చిన్న చేపల్ని వెరవేశాను
దేశాన్ని దుక్కి దున్ని చదును చేశాను
ఆశల గింజలు చల్లాను
ప్లీజ్‌ ... క్షణం ఆగుతావా?