సహృదయ సాహితీ మిత్రుడు

నివాళి
- ఏ. వి. రమణారావు9848710507


ఈ నెల 23న ఉదయాన్నే మిత్రులు స్వతంత్రకుమార్‌ గారి నుండి మెసేజ్‌. 'మన మిత్రుడు నూనెల శ్రీనివాస్‌ రాత్రి (22.07.2020) కె.జి.హెచ్‌ లో కోవిడ్‌ వలన మరణించాడు' అని. నిశ్చేష్టుడనయ్యాను. నమ్మబుద్ధికాలేదు. తేరుకుని స్వతంత్రకుమార్‌ గారికి ఫోన్‌ చేసి వివరాలు తెలుసుకున్నాను. ఆశచావక మా ఇద్దరికీ మిత్రుడు, పోర్ట్‌ ఉద్యోగి యూనియన్‌ నాయకుడు సత్యనారాయణకు ఫోన్‌ చేసాను. అతను మరిన్ని వివరాలతో శ్రీనివాస్‌ మరణాన్ని ధ్రువపరిచాడు. విషయాలను వాస్తవదష్టితో స్వీకరించే నేను శ్రీనివాసు మరణాన్ని అలా తీసుకోలేక పోయాను. మా సాహితీ మిత్రురాలు యెల్లాప్రగడ రమాదేవి గారు తెల్ల వారుఝామున 3గంలకే ఈ వార్త పంపారు వాట్సాప్‌ లో. అది తరువాత చూశాను. సాహితి మిత్రుల ఫోనులు మొదలయ్యాయి. మా మిత్రుడు, సాహితీస్రవంతి విశాఖ కమిటీ సభ్యుడు, పోర్టులో శ్రీనివాస్‌ సహఉద్యోగి, శివకోటి నాగరాజు ఉదయాన్నే డ్యూటీలో చేరగానే వార్త తెలిసి వొరప్రసాద్‌ గారికి, రఘుబాబుగరికి తెలియచేసాడు. నాకు చేశాడట కానీ నా ఫోను అందలేదు.
మిత్రులందరికి ఇది ఒక షాకే. వొరప్రసాద్‌ గారు, పెద్దలు తెలకపల్లి రవి గారు, దివాకర్‌ ఫోన్‌ చేశారు. రవిగారు విషయాన్ని తెలుసుకోవడమే గాకుండా శ్రీనివాసుతో మాకున్న సాహితీ అనుబంధాన్ని వివరంగా ప్రస్తావించారు. రఘుబాబు సందేశాన్ని, శ్రీనివాస్‌ కవితని పంపించారు. నాకన్నా 10 ఏళ్లు చిన్నవాడు, ఎంతో భవిష్యత్తు ఉన్నవాడు, శ్రీనివాస్‌ గురించి నేను శ్రద్ధాంజలి రాయాల్సిరావడం అత్యంత విషాదకరం.
విశాఖలో సాహితీస్రవంతి బాధ్యతలను చూస్తున్న జి.వి.ఎన్‌.చలపతి గారు వేరే ఇతర బాధ్యతలకు వెళ్లడంవలన నేను ఆ బాధ్యత స్వీకరించాను. ఎల్‌.ఐ.సి.యూనియన్‌ నాయకులు ఎన్‌.రమాణాచలం గారు, ఎన్‌.వి.ఎన్‌.స్వామి గారు నేను కార్యక్రమాలు ప్రారంభించాము. మాకు నూనెల శ్రీనివాస్‌ తొడయ్యాడు. స్వయంగా కవి, పాటల రచయిత శ్రీనివాసు మా బందంలో చేరడంతో ఎంతో సంతోషించాము. మేమంతా సాహిత్యాభిమానులమే కానీ అతనిలా కవులము కాము. సౌమ్యుడు, మితభాషి. కొద్ది సమయంలోనే తన సహౌద్యోగి శివకోటి నాగరాజును బందంలో చేర్చాడు. రమాణాచలంగారు గౌరవాధ్యక్షులుగా, నేను అధ్యక్షునిగా, శ్రీనివాస్‌ కార్యదర్శిగా సాహితీస్రవంతి విశాఖ శాఖ పనిచేయడం ప్రారంభించింది. ఇద్దరం సమన్వయంతో, మిత్రుల సహకారంతో సాహిత్య సభలు గత ఏడు సంవత్సరాలుగా నిర్వహిస్తూ వస్తున్నాము.
ప్రతీసంవత్సరం కవిసమ్మేళనాలు, మహకవులు శ్రీశ్రీ, గురజాడ, జాషువాల జయంతి, వర్ధంతి సభలు నిర్వహిస్తూ ఉండేవాళ్లం. 2015 ఏప్రిల్‌లో విశాఖపట్నం పబ్లిక్‌ లైబ్రరి లో ''జనకవనం'' ను పెద్దయెత్తున నిర్వహించడంలో శ్రీనివాస్‌ ముఖ్యపాత్ర వహించాడు. అధికసంఖ్యలో హాజరైన కవులకు భోజనాలు వడ్డించడం శక్తికి మించినపని అయింది. శ్రీనివాస్‌ వెంటనే తన మేనల్లుళ్ళనిద్దరిని రప్పించి ఆదుకున్నాడు. సభకి వచ్చిన మా నాగరాజు వాళ్ల మావయ్యగారు కూడా సహాయపడ్డారు. 10రోజులపాటు ఆంధ్రా యూనివర్శిటీ ఇంజనీరింగ్‌ కాలేజీ గ్రౌండ్స్‌లో నిర్వహించిన వైజాగ్‌ ఫెస్ట్‌ 2015 లో అన్నిరోజులూ ''గురజాడ సాహిత్యవేదిక'' పేరిట కవిసమ్మేళనాలు, సాహిత్యప్రసంగాలు నిర్వహించాము. ఈ ఫెస్ట్‌ లో సాహితీస్రవంతి బుక్‌ స్టాల్‌ నిర్వహణకు కూడా శ్రీనివాస్‌ తోడ్పడ్డాడు. స్టాల్‌ నిర్వహణ బాధ్యతను 10రోజులూ అత్యంత శ్రద్ధతో నిర్వహించిన సాహితీమిత్రురాలు కష్ణవేణి గారికి సహాయం చేయడానికి తన సోదరిని శ్రీనివాస్‌ తీసుకొచ్చేవాడు.
''జనకవనం'' లో ఎంపికైన కవితలతో వచ్చిన ''చైతన్య స్వరాలు'' సంచిక ఆవిష్కరణ సభ, ఆ సంధర్భముగా నిర్వహించిన కవితల రచనపై ''వర్క్‌ షాప్‌'' మేము నిర్వహించిన పూర్తిరోజు పెద్ద కార్యక్రమం. ఇది కూడా విశాఖపట్నం పబ్లిక్‌ లైబ్రరిలోనే నిర్వహించాము. సుమారు 125 మంది కవులు ప్రవేశ రుసుము చెల్లించి పూర్తిరోజు
ఉత్సాహంగా పాల్గొన్నారు. సమయం మించిపోయి హాలు ఖాళీ చేయాల్సివచ్చినా ఆరుబయట కూడా సభ జరగడం ఒక విశేషం. మిత్రుడు దివాకర్‌ సభలు విజయవంతం అవడానికి తోడ్పడ్డారు. శ్రీనివాసు, నేను, నాగరాజు మేము శక్తిమేరకు ఏర్పాట్లు చేశాము.
ఇదే సంవత్సరం (2015) నవంబరులో ''మహాకవి గురజాడ'' శతవర్ధంతిని శతాధిక సంస్థల ఆధ్వర్యంలో పెద్ద కార్యక్రమాన్ని తలపెట్టాము. అప్పటికి ఎమ్మెల్సీగా ఉన్న ఎం.వి.ఎస్‌.శర్మ గారి ఆధ్వర్యంలో ఒక నిర్వహణ కమిటీ ఏర్పరచి ఏర్పాట్లు చేశాము. ప్రజాసంఘాల ఆధ్వర్యములో నవంబరు 28న ఆంధ్రా యూనివర్శిటీ, అసెంబ్లీ హాల్‌ లో పూర్తిరోజు కార్యక్రమం విజయవంతముగా జరిగింది. సహజంగానే శ్రీనివాసుది ఇందులో సముచితపాత్రే. జూన్‌ 16, 2016 న విశాఖపట్నం పబ్లిక్‌ లైబ్రరిలో సాహితీస్రవంతి నిర్వహించిన ''విశాఖ కాలుష్యంపై కవితాభేరి'' విజయవంతం చేయడంలో మా నూనెల శ్రీనివాస్‌ ది కీలక పాత్ర. ఈ కార్యక్రమం సాహితీస్రవంతి కి మంచి పేరు తెచ్చింది. ఆ సందర్భంగానే కవయిత్రి వైష్ణవిశ్రీ పరిచయం అయ్యారు. అప్పటినుండి ఆమెకు శ్రీనివాసు సోదరసమానుడై కవితల రచనలో ఎంతో ప్రోత్సాహాన్ని ఇచ్చేవాడు. ఈ విషయాన్ని శ్రీనివాసు మరణం వార్త తెలిసిన వైష్ణవిశ్రీ గారు ఎంతో వేదనతో ఫేస్బుక్‌ లో పంచుకున్నారు.
2017 డిసెంబరు 1- 10 వరకు ఆంధ్రా యూనివర్శిటీ ఇంజనీరింగ్‌ కాలేజీ గ్రౌండ్స్‌ లో మరలా వైజాగ్‌ ఫెస్ట్‌ జరిగింది. గురజాడ సాహిత్య వేదిక నేర్పరచి పది రోజులూ సాహిత్య కార్యక్రమాలను నిర్వహించడంలో, ఆ సందర్భంగా నిర్వహించిన ''కవితలపోటీ'' కి వచ్చిన కవితల ఎంపికలోను నూనెల శ్రీనివాసు తన పాత్రను సముచితముగా నిర్వహించాడు. వైజాగ్‌ ఫెస్ట్‌ కమిటీ సహాయముతో, ఎంపిక చేసిన కవితలతో ''కవితాకెరటాలు'' అనే సంపుటిని జూలై, 2018లో వెలువరించాము.
ఏ కార్యక్రమం తలపెట్టినా వెంటనే అంగీకారం తెలిపి తన భాగాన్ని చిత్తశుద్ధితో నిర్వహించేవాడు. అంశాన్ని ఎంచుకోవడం, వక్తలను నిర్ణయించుకోవడం, సాహితీ మిత్రులను ఆహ్వానించడం, బేనర్‌ వ్రాయించడం, హాల్‌ ఏర్పాట్లు, అన్నిటిని పంచుకుని నిర్వర్తించేవాళ్లం. ఏ పని చెప్పినా వెంటనే అందుకునే మిత్రుడు నాగరాజు కూడా మాకు తోడయ్యేవాడు. గత ఏడాదికి పైగా గాజువాక లో సొంత ఇల్లు నిర్మాణములో మునిగి సాహిత్య వ్యాసంగంలో కాస్త వెనుకబడ్డాడు. అయిన గత ఏడాది సాహితి స్రవంతి నిర్వర్తించిన కార్యక్రమాలలో వెసులుబాటు చేసుకుని పాల్గొన్నాడు. జనవరి 31,2019న ప్రముఖ గేయరచయిత సుద్దాల అశోక్‌ తేజ రచించిన ''శ్రమకావ్యం'' ను ఆవిష్కరించుకున్నాం. ఏ కార్యక్రమమైనా అయిన వెంటనే ఇంటికి చేరగానే నాకు ఫోన్‌ చేసి తన సంతోషాన్ని పంచుకోవడం ''చాలా బాగా జరిగింది కదండీ'' అని పొంగిపోవడం అతని నైజం. గత పార్లమెంట్‌ ఎన్నికలముందు వైజాగ్‌ ఫెస్ట్‌ సహకారంతో ''వోటు విలువ'' పై కవిసమ్మేళనం నిర్వహించి మంచి కవితలను రాబట్టాము. ఈ సంధర్భంగా సాహితీవేత్త రామతీర్థగారిని కూడా సన్మానించాము. ఇది శ్రీనివాసు ప్రతిపాదనే.
ప్రజాసంఘాల సహకారంతో జూన్‌ 5,2019న కందుకూరి వీరేశలింగం గారి శతవర్ధంతి సభ కళాభారతిలో పూర్తిరోజు విజయవంతంగా నిర్వహించేము. తన ఇంటిపని వొత్తిడిలోకూడా సభ జయప్రదం కొరకు నిధుల సేకరణకు శ్రీనివాసు మంచికషి చేశాడు. దీని తరువాత జూన్‌ 15, 2019 న నిర్వహించిన మహాకవి శ్రీశ్రీ వర్ధంతి సభ ఊహించినదానికన్నా జయప్రదం అవడాన్ని పలుమార్లు శ్రీనివాసు ప్రస్తావించేవాడు. అదే మేమిద్దరం నిర్వహించిన ఆఖరి సాహిత్యసభ. సాహితీస్రవంతి రాష్ట్రకమిటీ ఇచ్చిన పిలుపు ప్రకారం ఈ సంవత్సరం మహాకవి శ్రీశ్రీ 110 వ జయంతి సభను 26.4.2020 బాగా నిర్వహించాలనుకున్నాము. ఈ కార్యక్రమం ఎలా జయప్రదం చేయాలి, అలాగే మార్చ్‌15 న విజయవాడలో ''భారత కవనం'' సదస్సుకు ఎవరిని కదిలించాలి అన్న అంశాలను చర్చించేందుకు ఫిబ్రవరి27న కంచరపాలెంలో ఉన్న ''బొట్టా నరసింగరావు భవన్‌''లో సమావేశమయ్యాం. అదే మేము ఆఖరి సారి కలుసుకోవడం. అదే శాశ్వతమవుతుందని కలలోకూడా ఊహించలేదు.
కరోనా విలయం పై కవితల పోటీ నిర్వహించాలని ఇద్దరం భావించి విశాఖ సాహితి మిత్రులకు పిలుపునిచ్చాము. ఆ పోటీకి కవితలను సేకరించడంకోసం చాలా మంది కవులకు శ్రీనివాసు పలుమార్లు ఫోన్లు చేసి వెంటబడ్డాడు. సుమారు 25 కి పైగా కవితలు వచ్చాయి. సభ జరిపి బహుమతులు ఇద్దామనుకున్నా కరోనా వలన సాధ్యపడలేదు.
తాను ఏ కవిత వ్రాసినా ముందు నాకు పంపి చూడమనే వాడు. సవరణలు చేయమనేవాడు. నేను ఏ సవరణను సూచించినా భేషజం లేకుండా అంగీకరించేవాడు. ఆంగ్ల మాధ్యమంలో చదువుకోవడం వలన తన తెలుగులో కొన్ని అక్షరదోషాలుంటాయని వాటిని పరిష్కరించమని అడిగేవాడు. కవితలను వచనాలుగా వ్రాస్తున్నా ఎంతో భేషజం చూపే కవులు తయారైన నేడు, తాను మంచి కవిత్వం వ్రాస్తూ కూడా ఏ మాత్రం భేషజం లేకుండా, నమ్రతగా మెలగడం శ్రీనివాసు ప్రత్యేకత. కరోనా విలయం పైన కూడా మంచి కవితలను వ్రాశాడు. తన సహాధ్యాయులకోసం వాటిని ఇటీవల ఇంగ్లిష్‌ లోనికి తర్జుమా కూడా చేయడం ప్రారంభించాడు. అతని ఇంగ్లిష్‌ కూడా బాగానే ఉండేది. ఇతర యువ కవులను ప్రోత్సహించడానికి నిరంతరం కషి చేసే వాడు. ఆ విధంగానే మిత్రురాలు, కవయిత్రి ఉండవిల్లి సుజాతమూర్తి, యువకవి సందీప్‌ రుద్రక్షుల మా బందంలో సభ్యులు అయ్యారు.
మహమ్మారి అంతమవగానే విశాఖలో సాహితీస్రవంతి కమిటీని పునర్నిర్మించుకోవాలని, వాయిదా పడిన మహాకవి శ్రీశ్రీ 110వ జయంతిని ఘనంగా జరపాలని ఇద్దరం ఫోన్లో చర్చించుకునేవాళ్లం. కానీ ఇంతలోనే ఆ మహమ్మారి శ్రీనివాసును బలితీసుకోవడం నాకు వ్యక్తిగతంగాను, సాహితిస్రవంతికి, విశాఖ సాహితీ లోకానికి పూడ్చలేని లోటు.
సాహితీస్రవంతి, విశాఖశాఖకు కూడా శ్రీనివాసు లేకుండా పనిచేయడం పెద్దయెత్నమే. అయినా పరిస్థితులు చక్కబడగానే మా యత్నాలను ముమ్మరం చేయడమే అతనికి మేమిచ్చే సాహితీ నివాళి. ఆ సాహితీ సహచరుడికి నా శ్రద్ధాంజలి. అతని కుటుంబానికి నా ప్రగాఢ సానుభూతి.
(అధ్యక్షుడు, సాహితీస్రవంతి, విశాఖ.)